የፌዴራል የሥነ ምግባርና የጸረ ሙስና ኮምሽን ሶስት ሕጎችን በማሻሻል ላይ መሆኑ ተሰማ፡፡

በዚህ ሕግ መሠረት የሕዝብ ገንዘብ ዘርፈው ወደውጪ አገር ፈርጥጠዋል የሚባሉ ሰዎች ተጠያቂ ይሆናሉ ተብሎ ይገመታል ፡፡

የሚሻሻሉት ሕጎች የተሻሻለው የጸረ ሙስና ልዩ የስነስርዓትና የማስረጃ ሕግ አዋጅ እንደገና ለማሻሻል የወጣውን
ረቂቅ አዋጅ፣ የተሻሻለውን የስነምግባርና የጸረ ሙስና ኮምሽን ማቋቋሚያ አዋጅ እንደገና ለማሻሻል የወጣ ረቂቅ
አዋጅ እና የሙስና ወንጀሎችን እንደገና ለመደንገግ የተዘጋጀ ረቂቅ አዋጅ ናቸው፡፡

ረቂቅ አዋጆቹ በኮምሽኑ ተዘጋጅተው የሚመለከተው የመንግስት አካል አስተያየት እንዲሰጥበት የተደረገ ሲሆን በቅርቡ
ለሚኒስትሮች ም/ቤት ቀርበው በቀጣይ ዓመት ፓርላማው ያጸድቃቸዋል ተብሎ እንደሚጠበቅ የፓርላማ ምንጮች ጠቅሰዋል፡፡

ምንጫችን እንዳብራራው በተለይ የኮምሽኑን ማቋቋሚያ አዋጅ ማሻሻያ ውስጥ የግሉ ዘርፍ በሙስና ወንጀል ለመጠየቅ
የሚያስችለው አንቀጾች ተካተውበታል፡፡

አሁን በስራ ላይ ያለው አዋጅ ኮምሽኑ የሚመለከተው የሙስና ወንጀል በአመዛኙ የመንግስትን ተቋማት ብቻ የሚመለከት ሆኖ ነገር ግን ወንጀሉ ከግሉ ዘርፍ ጋር በትብብር መፈጸሙ ማስረጃ ካለ የግሉን ዘርፍ በተጨማሪነት መክሰስ የሚያስችለው ነው፡፡ በአዲሱ ረቂቅ አዋጅ በተለይ ከሕዝብ በአክስዮን መልክ ገንዘብ ሰብስበው ዞር የሚሉ ሌቦችን ለመቅጣት እንዲያስችለው አክስዮን ማኀበራትን፣ ባንኮችን፣  ኢንሹራንሶችን ፣የልማት ማኀበራትንና የመሳሰሉትን ሕጉ እንዲያቅፍ ተደርጓል፡፡
በግል ባንኮች በተመሳሳይ መንገድ ያለበቂ ዋስትና ብድር የሚሰጥበት፣ ባንኮቹ ከፍተኛ አክስዮን ባላቸው
ግለሰቦችን ተጽዕኖ ስር ሲወድቁና ገንዘባቸው ያለአግባብ በብድር ስም ሲመዘበር ዝም ብሎ ማየት ወይም ተባባሪ
የመሆን ሁኔታ በተደጋጋሚ መከሰቱን፤ በዚህም መንገድ የሕዝብ ገንዘብ ተበልቶ የሚቀርበት ሁኔታ በስፋት በመኖሩ
ለሕዝብ ጥቅም ሲባል የሕጉ መሻሻል እጅግ ጠቃሚ ያደርገዋል ተብሎአል፡፡

ይሁን እንጅ ህግ ማውጣት  ብቻውን ሙስናን ለመከላከል በቂ አለመሆኑን ጉዳዩን የሚከታተሉ ወገኖች ይገልጻሉ። ጸረ ሙስና ኮሚሽን በቅርቡ በገቢዎች ሚ/ር ሰራተኞች ላይ ክስ ከመሰረተ በሁዋላ ተጨማሪ እንቅስቃሴ ሲያደርግ አልታየም።

አንድነት ፓርቲ በወከባ ውስጥ ሆኖ የተቃውሞ ሰልፎችን ለማዘጋጀት እየጣረ ነው

ፓርቲው በመጪው እሁድ በመቀሌ፣ ባህርዳር፣ ጅንካ እና አርባ ምንጭ የሚያደርገውን የተቃውሞ ሰልፍ ተከትሎ የገዢው ፓርቲ ሰዎች ሰልፎችን ለማደናቀፍ ከፍተኛ ጥረት እያደረጉ ነው። በመቀሌ የአንድነት አመራሮች መጉላላት የደረሰባቸው ሲሆን፣ በጅንካ ደግሞ አካባቢው የሽብርተኞች ጥቃት ኢላማ በመሆኑ ሰልፉን ማድረግ አይቻልም የሚል መመሪያ እስከ ማስተላለፍ ተደርሶ ነበር። የአንድነት አመራሮች ባሳዩት የአቋም ጽናት ሰልፉ እንዲደረግ ፈቃድ ማግኘታቸው ታውቋል።

ከ2 ቢሊዩን ብር በላይ በሆነ ወጭ የተገነቡ የውሃ ተቌማት ላይ ጉዳት ደረሰ

በአማራ ክልል በሚገኙ የተለያዩ ዞንና ወረዳዎች በበጎ አድራጊዎች ድጋፍና በህብረተሰቡ የተገነቡ ከ110 በላይ  የውሃ ተቌማት ላይ የእጅ ፓምፕ ዝርፊያ በመፈጸሙ በውሀ አቅርቦቱ ላይ ችግር ተፈጥሯል።

ዝርፊያውን ተከትሎ የወረዳ አመራሮች ለህዝቡ ተቃዋሚ ፓርቲዎች ናቸው እያሉ ፤ ፓርቲዎችን የማሰጠላት ዘመቻ እያከናወኑ ነው፡፡

በተለያዩ  አካባቢዎች እየተከሰተ ባለው የውሃ ተቋማት ዝርፊያ እስካሁን ወደ 250 የሚጠጉ ሰዎች  ከ2 ወር እስከ 12 ዓመት በእስራት እንዲቀጡ ተደርጓል።

ባለፉት ዘጠኝ ወራት ብቻ በደቡብና ሰሜን ጎንደር ፤ደቡብና ሰሜን ወሎ የእጅ ውሃ ማውጫ ፓምፖች ተሰርቀው ከጥቅም ውጭ ሁነዋል፡፡

የጉዳቱን መጠንና ችግሩን በተመለከተ የክልሉ ውሃ ሃብት ቢሮው ይፋ ያላወጣው ሪፖርት እንደሚያመለክተው የችግሩ መጠን መባባሱን ያሳያል፡፡ በዚህ ሂደት ተሳታፊ ናቸው የተባሉ ወገኖች ላይ እርምጃ ለመውሰድ የተሞከረ ቢሆንም እስካሁን ሙሉ በሙሉ በቁጥጥር ስር ማዋል አልተቻለም፡፡

በጎንደር ከተማ ህዝበ ሙስሊሙ በመንግስት ላይ ቅሬታውን እየገለጠ ነው፡፡

የመቃብር ቦታ ጥያቄያችን አልተመለሰም ፤ ለመስጊዶቻችንን  የባለቤትነት ማረጋገጫ ደብተር ተከልክለናል፡፣ ሙስሊሙ ህብረተሰብ ፍትህ አጥቷል” በማለት ሙስሊሞች ተናግረዋል።

የጎንደር ከተማ ኗሪ የሆኑት ሐጅ ሙርፉቅ ሙስሊሙ ከመንግስት ጋር ሆድና ጀርባ መሆኑን ገልጸዋል።

በየቀኑ ደብዛቸው እየጠፋ በአፋልጉኝ የሚጠሩት ህዝበ ሙስሊሞች የመንግስት የአፈና ውጤት መሆናቸውን የተናገሩት የጎንደር ህዝበ ሙስሊሞች፤ያለምንም ፍትህ የሚያስረውና የሚያንገላታው ኢህአዴግ የማሰተዳደር አቅሙ ደካማነትን የሚያረጋግጥ የእምነት አፈናው ውጤት ነው ሲሉ ተናግረዋል፡፡

የህዝበ ሙስሊሙን ድምጽ በማፈን ስልጣንን ማቆየት አይቻልም በማለት የተበሳጩ አንዳንድ ወጣቶች ፤ ለዘገባ በሄዱ በአማራ ክልል ጋዜጠኞች ላይ ጥቃት ሰንዝረዋል፡፡

ጋዜጠኞቹ ፤ የረመዳንን ክብረ በዓል ለማክበር  የቅድመ ዝግጅት ቀረጻ ለማድረግ ፤ ቅዳሜ ገበያ ዋናው  መስጊድ የሶላት ስርዓትን ለመቅረጽ በተገኙበት ስዓት ነው ጥቃቱ የተሰነዘረባቸው። ” ያለ ፈቃዳችን መንግስት እየቀረጸ ‹‹ ጅሃዳዊ ሃረካት›› የተሰኝ ፊልም ቆርጦ በመቀጠል ለሚያዘጋጀውና ሙስሊሞችን በመወንጀል ለሚተባበር እውነት አልባ ሚዲያ ፤ ልንቀረጽ አይገባም” በማለት ባነሱት ተቃውሞ ፤ በመስል ቀራጩ ወይም ካሜራ ማኑ ላይ አካላዊ ጉዳት አድርሰውበታል ።  ካሜራ ማኑ የያዘውን ካሜራም መሬት ላይ ከስክሰውታል።  አድማ በታኞች ፖሊሶች በስፍራው ሲደረሱ ወጣቶቹ ሮጠው  አምልጠዋል።

ህዝበ ሙስሊሙ መንግስት ፤ በሚያደርስብን ጭቆና ፤ ከእምነት ተቋማችን እንዲደርስ አንፈልግም ‹‹አላህ ወ አክብር ›› ሲሉ ተደምጠዋል፡፡

የህዝበ ሙስሊሙ ጥያቄ በመላ ሐገሪቱ እየበረታ መምጣቱን ተከትሎ በመላ ሐገሪቱ ከጅማ ፤ከከሚሴ ፤ደሴ ፤ ወልድያ፤ ቀጥሎ በአራተኛነት ደረጃ ጎንደር በስጋት ቀጠና መንግስት በሐይማኖት አክራሪነት የፈረጃቸው ከተማዎች ናቸው ፡፡

የመድረክ ሕዝባዊ ስብሰባ የፊታችን እሁድ ይካሄዳል

የአራት ፓርቲዎች ግንባር የሆነው የኢትዮጵያ ፌዴራላዊ ዴሞክራሲያዊ አንድነት መድረክ በአደባባይ ላይ ሊያካሂድ ያቀደውን የአደባባይ ሰልፍ ተገዶ ወደ ሕዝባዊ ስብሰባ መቀየሩ ታውቋል፡፡ በዚሁ መሠረት ግንባሩ የፊታችን እሁድ ሐምሌ 28 ቀን 2005 ዓ/ም ሕዝባዊ ስብሰባ መጥራቱን የአዲስ አበባው ዘጋቢ ገልጿል፡፡

ከወቅታዊ የአገራችን ጉዳዮች ጋር በተያያዘ ሐምሌ 7 ቀን 2005 ዓ.ም በአዲስአበባ ከስድስት ኪሎ እስከድላችን ሐውልት ድረስ ሕዝባዊ ሰልፍ ለማካሄድ ግንባሩ መርሃግብር ነድፎ የተንቀሳቀሰ ቢሆንም የአዲስአበባ ከተማ አስተዳዳር ከተማዋ በተለያዩ ልማቶች የተቆፋፈረች በመሆኑዋ ሰልፉን ለማካሄድ አመቺ አይደለም በሚል ምክንያት ፈቃድ መከልከሉ ታውቋል፡፡መድረክ የአደባባይ ሰልፉን በቤት ውስጥ ስብሰባ በመቀየር በድጋሚ ለአስተዳደሩ እንዲያውቀው ያስገባው ይፋዊ ጥያቄ አዎንታዊ ምላሽ አግኝቶ ስብሰባው በአዲስ አበባ ሜክሲኮ አካባቢ በሚገኘው የመብራት ኃይል አዳራሽ ሐምሌ 28 ቀን 2005 ለማካሄድ ዝግጅቱን ማጠናቀቁ ታውቋል፡፡

ኢህአዴግ የመለስ ሙት አመት መታሰቢያን በልዩ ዝግጅት ሊያከብር ነው

የአዲስ አበባ ከተማ አስተዳደር የቀድሞ ጠ/ሚኒስትር አቶ መለስ ዜናዊ ሙት ዓመት አከባበር ሥነ ሥርዓት ጋር  በተያያዘ ሠራተኞቹን በየደረጃው ማወያየት ጀመረ፡፡ሕዝብ በከፍተኛ ደረጃ ከመሰልቸቱ ጋር ተያይዞ በመንግስት መገናኛ ብዙሃን ሽፋናቸው እንዲቀንስ ተደርጎ የነበሩት የአቶ መለስ ርዕሰ ጉዳይ- ሙት ዓመታቸውን ተከትሎ እንደገና አዲስ አጀንዳ ሆኗል፡፡

የአስተዳዳሩ ምንጮች እንደገለጹት የአቶ መለስን ሙት ዓመት በአረንጓዴ የልማት ዘመቻ ለማክበር ታስቦ ሥራው መጀመሩን፣ የሻማ ማብራት ስነስርዓት እንደሚኖር፣ የእሳቸውንም ራዕይ ለማሳካት የተጀመረው ጥረት በቀጣይም ተጠናክሮ እንደሚቀጥል ለሠራተኞቹ ተነግሯቸዋል፡፡

ባለፈው ዓርብ ዕለት የአዲስ አበባ መገናኛ ብዙሃን ሠራተኞች በዚሁ ርዕሰ ጉዳይ ላይ በመወያየት የመለስን ራዕይ አጠናክሮ ለመቀጠል እንደሚተጉ ባወጡት የአቋም መግለጫ ጠቅሰዋል፡፡

አንዳንድ የኢህአዴግ አባላትና ካድሬዎች በስብሰባው ላይ እንደ አዲስ ሲያለቅሱም ታይተዋል፡፡

ነሐሴ 14 ቀን 2005 ዓ.ም ታስቦ የሚውለውን የአቶ መለስ ሙት ዓመት በማስመልከት ከ40 ሚሊየን ብር በላይ ይገኝበታል የተባለ በሞባይል የሚካሄድ ሎተሪ እንደሚጀመር ለሠራተኞቹ እንደተገለጸላቸው፤ ይህም ገቢ ለመለስ ፋውንዴሽን ሥራዎች ይውላል ተብሎ እንደተነገራቸው ታውቋል፡፡

የፋውንዴሽኑ የቤተመጽሐፍትና ሙዚየም ግንባታ የመሰረት ድንጋይ በዚሁ ሰሞን ይጣላል ተብሎ የሚጠበቅ ሲሆን ለተመረጡ ተማሪዎች በአቶ መለስ ስም ስኮላርሺፕ መስጠትን በተመለከተ ዝርዝር መረጃ ይሰጣል ተብሎ ይጠበቃል፡፡ በእነ አርቲስት ሰርጸ-ፍሬ ስብሃት፣ ደበሽ ተመስገንና  ሰራዊት ፍቅሬ የሚመራ የስነጥበብ ባለሙያዎች ቡድን ለሙት ዓመቱ ለየት ያሉ  ስራዎች ለማቅረብ ደፋ ቀና እያለ እንደሚገኝ ምንጮቻችን ጠቅሰዋል፡፡

የመለስ ፋውንዴሽን በአዋጅ ቁጥር 781/2005 ተቋቁሞ በመጋቢት ወር መጨረሻ በአፍሪካ ህብረት አዳራሽ በተካሄደ ስነስርዓት በይፋ መመስረቱ የሚታወቅ ሲሆን በዕለቱም በተካሄደ የገቢ ማሰባሰቢያ በአንድ የእራት ምሽትብቻ ከ110 ሚሊየን ብር በላይ  መሰብሰቡ አይዘነጋም፡፡ ፋውንዴሽኑ በአዋጅ

የአንድነት አባል የሆኑት አቶ ግርማ ወልደሰንበት አረፉ

አቶ ግርማ በህይወት ዘመናቸው ለሚወዷት ሀገራቸው ደከመኝ ሰለቸኝ ሳይሉ በተለያዩ ሀርፎች ያገለገሉ ሲሆን ወደ ፖለቲካው በመግባትም ትልቅ ዋጋ የከፈሉ የቁርጥ ቀን ልጅ ነበሩ ሲል አንድነት ፓርቲ ለኢሳት በላከው መግለጫ አመልክቷል።

አቶ ግርማ ወደ ተቃውሞ ጎራው ትግል የገቡት ለ1984 ዓ/ም ከፕ/ር አስራት ወልደየስ ጋር በመሆን መአህድን በመመስረት ነው። የመኢአድ አባልና የአዲስ አበባ ሰብሳቢ በሁዋላም የብርሀን ፓርቲ ም/ል ሊቀመንበር የነበሩ ሲሆን ከሁለቱ ፓርቲዎች ውህደት በሁዋላ ከዚህ አለም በሞት እስከተለዩበት ቀን ድረስ የአንድነት ፓርቲ የብሄራዊ ም/ቤት አብልና የፋይናንስ ቃሚ ኮሚቴ አባል በመሆን ደከመን ሰለቸኝ ሳይሉ በቁርጠኝነት ትግል ማካሄዳቸውን ፓርቲው ገልጿል።

አቶ ግርማ ወልደሰንበት ለኢሳት የነበራቸውን ድጋፍም በተለያዩ መንገዶች ሲገልጹ ቆይተዋል። በቅርቡም ታመው በሚሰቃዩበት ወቅት እንኴ የኢትዮጵያ ህዝብ ኢሳትን እንዲደግፍ ጥሪ አቅርበው ነበር።

የኢሳት ባልደረቦች በአቶ ግርማ ወልደሰንበት ሞት የተሰማውን ሀዘን እየገለጸ ለቤተሰቦቻቸው ለወዳጆቻቸው እና ለትግል ጓደኞቻቸው መጽናናት

እነዲሆንላቸው ልባዊ ምኞታቸውን ይገልጻሉ