በሽብርተኝነት የተከሰሱት የሰማያዊ ፓርቲ አመራሮች ወደ ማዕከላዊ ተዛወሩ

በሽብርተኝነት ተከሰው አርባምንጭ ታስረው የነበሩት የሰማያዊ ፓርቲ የጋሞ ጎፋ ዞን አመራሮች ከነበሩበት የአርባ ምንጭ እስር ቤት አዲስ አበባ ወደሚገኘው የፌደራል ወንጀል ምርመራ መዘዋወራቸው ታወቀ፡፡

ከዞኑ አመራሮች መካከል የአርባ ምንጭ ምክትል ሰብሰቢ አቶ በፍቃዱ አበበ እና ደርጅት ጉዳይ ኃላፊው ኢንጅነር ጌታሁን በየነ ጱግሜ 5 ከቀኑ 9 ሰዓት ጀምሮ ወደ ማዕከላዊ የተዘዋወሩ ሲሆን ቀሪዎቹ አሁንም አርባምንጭ ውስጥ ታስረው ይገኛሉ፡፡

ወደ ማዕከላዊ የተዘዋዋሩትን የሰማያዊ ፓርቲ የጋሞጎፋ አመራሮች ምግብና ልብስ ከማቀበል ውጭ መጠየቅ እንደማይቻል የፓርቲው የአደረጃጀት ጉዳይ ኃላፊ አቶ ብርሃኑ ተክለያሬድ ለነገረ ኢትዮጵያ ገልጸዋል፡፡

በጋምቤላ የተነሳውን ግጭት ተባብሶ ቀጥሏል

የመዠንገር ብሄረሰብ ተወላጆች ጎደሬና ሜጫ በሚባሉት አካባቢዎች እንደ አዲስ በጀመሩት ጥቃት በርካታ ሰዎች መገደላቸውንና እስካሁን አስከሬኖች እንዳልተነሱ የአካባቢው ምንጮች ገልጸዋል። ከጋምቤላ ብሄረሰብ ውጭ ያሉ የሌሎች አካባቢ ተወላጆች በሙሉ ይወጡ

በሚል የተጀመረው ግጭት ፣ ደም አፋሳሽ ሆኖ ከመቀጠሉ ባሻጋር፣ በትናንትናው እላት ብቻ ከ1 ሺ ያላነሱ

ሰዎች ተፈናቅለው ቴፒ ከተማ መግባታቸው ታውቋል።

ጉዳዩን በቅርበት የሚከታተሉ ሰዎች እንደሚሉት ዋነኛው የግጭት መንስኤ በጡረታ የተገለሉ የህወሃት የጦር መኮንኖች የአካባቢውን መሬት በርካሽ ዋጋ በመግዛት ነዋሪዎችን ማፈናቀላቸውና አካባቢውን እየተቆጣጠሩ መምጣታቸው መሆኑን አስተያየት ሰጪዎች ይገልጻሉ።

የመዠንገር ጎሳ አባላት ብሄር ሳይለዩ በማንኛውም ሰው ላይ ጥቃት እየፈጸሙ ሲሆን፣ ካለፉት ሁለት ወራት

ጀምሮ በርካቶች ተገድለው በሺ የሚቆጠሩት ዜጎች ደግሞ ተፈናቅለዋል።

የክልሉ የጸጥታ ሹም መያዛቸውና የቀድሞው የክልሉ ፕሬዚዳንት ኦኬሎ አኳይ ደቡብ ሱዳን ውስጥ ተይዘው ለኢህአዴግ መንግስት ተላልፈው መሰጠታቸው ለአሁኑ ግጭት ማገርሸት ምክንያት መሆኑን ምንጮች ይናገራሉ።

ግጭቱን ለመቆጣጠር ወደ ስፍራው ያመራው የፌደራል ፖሊስ ሰራዊትም ከአካባቢው ታጣቂዎች በደረሰባቸው ጥቃት ከፍተኛ ጉዳት እንደደረሰባቸው ምንጮች ገልጸዋል።

ግጭቱ ይህን ዜና እስካጠናከርንበት ጊዜ ድረስ ቀጥሎአል።በጉዳዩ ዙሪያ የክልሉን ባለስልጣናት ለማነጋገር ሙከራ ብናደርግም አልተሳካልንም።

ኢሳት በትናንትና የዜና እወጃው ከ9 ያላነሱ ሰዎች መገደላቸውን ጠቅሶ ነበር። ይሁን እንጅ የአካባቢው ምንጮች እንደሚሉት የሟቾች ቁጥር ከተጠቀሰው አሃዝ በላይ ነው።

“የይቅርታ ልብ ያስፈልገናል” – አዲሱን ዓመት በማስመልከት በስደት ከሚገኘው ሲኖዶስ የተላለፈ መልዕክት

በፓትሪያሪክ አቡነ መርቆርዮስ የሚመራው ቅዱስ ሲኖዶስ አዲሱን ዓመት በማስመልከት ባስተላለፈው መልዕክት አዲሱን ዘመን አዲስ መፍትሄ የምንፈልግበት ዘመን ልናደርገው ይገባል አለ። ቅዱስ ሲኖዶሱ ለዘ-ሐበሻ በላከው የአዲስ ዓመት መግለጫው “ብዙዎቻችን በልዩነቶቻችን ምክንያት በጥላቻ ስሜት ውስጥ ነን። ለዚህ የይቅርታ ልብ ያስፈልገናል። የቀድሞ አባቶቻችን በይቅር ለእግ ዚአብሔር ላይ የተመሰረተ ይቅርባይነት ብዙ ለውጥ ያመጡ ነበር። ‘በቀል የኔ ነው ያለውን አምላካዊ ቃል መሰረት አድርገው ጥላቻን ሳይውል ሳያድር ከመካከላቸው እያስወገዱ አንድነታቸውን ጠብቀው ኖረዋል” ብሏል።

ሙሉ መል ዕክቱን ለማንበብ እዚህ ይጫኑ

“2007 ዓ.ም የኢትዮጵያ መፃዒ እድል የሚወሰንበት ዓመት በመሆኑ ሁላችንም በተነሳሳ የአርበኝነት መንፈስ እንቀበለው” – ግንቦት 7

2007 ወሳኝ የትግል ዓመት!!!

የግንቦት7 በወቅታዊ ጉዳዮች ላይ የበተነው ጽሑፍ

ሁለት ሺህ ስድስት ዓመተ ምህረት ለኛ ለኢትዮጵያዊያን በአብዛኛው በመጥፎ የሚታወስ ዓመት ነው። 2006፣ በመካከለኛው ምስራቅም ሆነ በአፍሪቃ በስደት ላይ የሚገኙ ወገኖቻችን ላይ የሚደርሰው ስቃይ ከፍተኛ ደረጃ ላይ የደረሰበት ዓመት ነበር። 2006፣ ቀደም ባሉ ዓመታት አገራቸዉን ለቅቀዉ የተሰደዱ ሳይደላቸው በርካታ አዳዲስ ስደኞች ከአገር ወጥተው በበረሃዎችን ቀልጠው፤ በባህር ሰጥመው ያለቁበት አሳዛኝ ዓመት ነው። 2006፣ ጥንቃቄ በተሞላበትና በተቆጠበ መንገድም ቢሆን የተቃውሞ ድምጽ ያሰሙ ወገኖቻችን ወደ እስር ቤቶች የተጋዙበት ዓመት ነው። 2006፣ በአምቦ፣ በለቀምት፣ በጅማ በሀረር በርካታ የዩኒቨርስቲ ተማሪዎች የተገደሉበት፤ በአስር ሺዎች የሚገመቱት ደግሞ የታሰሩበት ዓመት ነው። 2006፣ በአፋር፣ በኦሮሚያ፣ በደቡብ፣ በቤንሻንጉል፣ በጋምቤላ፣ በአዲስ አበባና አካባቢው በ100 ሺዎች የሚገመት ኢትዮጵያዊ የተፈናቀለበት ዓመት ነው። 2006 ቁጥራችው ቀላል ያልሆኑ የነፃነት ታጋዮች ከጎረቤት አገራት ታፍነው ወደ እስር ቤቶች የተጋዙበት ዓመት ነው። 2006 የንቅናቄዓችን ዋና ፀሐፊ አቶ አንዳርጋቸው ጽጌ በጉዞ ላይ እያለ በትራንዚት አውሮፕላን ለመቀየር ባረፈበት በየመን ዋና ከተማ ሰንዓ በየመን መንግሥት ወንበዴዎች ታፍኖ ለሸሪካቸው ህወሓት በህገወጥ መንገድ አስተላልፈው ለስቃይ እንዲዳረግ የተደረገበት ዓመት ነው። በእነዚህ ሁሉ ምክንያቶች ነው 2006 “ጥቁር ዓመት” የሚል ስያሜ ያገኘው።

ጭንቅላት የሚባል ነገር ያልፈጠረባቸው ድኩማን ሰላዮችና ፈንጋዮች የመጨረሻውን የመንግሥት ሥልጣን የያዙበትና ውሳኔያቸው “እሰረው፣ ክሰሰው፣ ግረፈው፣ ግደለው …” ብቻ የሆነበት ዓመት መሆኑ የ2006 ልዩ መታወቂያው ሆኖ ይቆይ ይሆናል። ይሁን እንጂ በ2006 ጨለማ ውስጥ የታዩ የብርሃን ጨረሮችም እንደነበሩና እንዳሉም መርሳት አይገባም።

በሁለት ሺህ ስድስት ዓመተ ምህረት የኢትዮጵያ ሕዝብ ከመቸውም በላይ በህወሓት አገዛዝ አምርሯል፤ በሁለገብ ትግል የህወሓትን አገዛዝ ለመፋለም የቆረጡ ወገኖች ትብብር ተጠናክሯል። በ2006፣ ኢትዮጵያ ዉስጥም ከኢትዮጵያም ውጭም የንቅናቄዓችን የግንቦት 7 ድርጅታዊ መዋቅር ተጠናክሯል። በ2006፣ ከህወሓት አገዛዝ ጋር ያለው መፋጠጥ ከሯል። እነዚህ ሁኔታዎች 2007 አገራችን በለውጥ ማዕበል የምትናጥበት ዓመት ሊሆን እንደሚችል ያመለክታሉ።

በአዲሱ ሁለት ሺህ ሰባት ዓመተ ምህረት፣ የግንቦት 7 አባላትና ደጋፊዎች ትልቁ ሥራ ድርጅታዊ አቅምን ማጎልበት ነው። በተለይ ወጣቶች በአምባገነን ሥርዓቶች ውስጥ ሕዝባዊ የትግል ድርጅቶችን እንዴት መመሥረት እንደሚቻል ማጥናት እና መፈተሽ ይኖርባቸዋል። ትናንሽ የግንቦት 7 ድርጅታዊ ቋጠሮዎች በመላው አገሪቱ መሠራጨት ይኖርባቸዋል። ወጣቶች ትናንሽ ኢ-መደበኛ ስብስቦችን ቶሎ መፍጠር እና አደጋ ሲያጋጥም ቶሎ ማፍረስ መልመድ ይኖርባቸዋል። ይህንን ክህሎት ደግሞ በቀጥታ ከሌሎች አገራት ከመዋስ ሀገር በቀል ቢሆን ይመረጣል።

በሁለት ሺህ ሰባት ዓመተ ምህረት፣ የጽዋ ማኅበሮች፣ መድረሳዎችና ጀማዎች፣ የስፓርት ቡድኖችና ደጋፊዎች፣ የመንደር ደቦዎችና የቡና ተርቲቦች፣ ስም ያላቸውም፣ ስም የሌላቸውም ስብስቦች የግንቦት 7 አባላት መገናኛዎች ይሆናሉ። በ2007 የግንቦት 7 አባል መሆን የምርጥ ዜግነት ምልክት መሆኑ በስፋት ተቀባይነት የሚያገኝበት ዓመት ይሆናል ብለን ተስፋ እናደርጋለን። በ2007 በህወሓት ካድሬዎች “ሽብርተኛ” መባል የሚያስደስትና እንደ ሽልማት ተደርጎ የሚወሰድበት ዓመት ይሆናል ብለንም ተስፋ እናደርጋለን። በ2007 እስር ማስፈራሪያ መሆኑ ያከትማል። በ2007 የኢትዮጵያ ወጣቶች በአርበኝነታቸው ይታወቃሉ። በ 2007 እያንዳንዱ ኢትዮጵያዊ የህወሓት ሹማንምትን ዘረፋ የሚያጋልጥበት ዓመት ይሆናል። 2007 ዳኞች “እንቢ፣ በሀሰት አንፈርድም”፤ የመንግሥት ጋዜጠኖች “እውነቱን ደብቀን አንዋሽም”፤ ፓሊሶች “ወገናችንን አንደበድብም፣ አናስርም፣ አንገርፍም”፤ ወታደሮች ደግሞ “በወገናችን ላይ አንተኩስም” የሚሉበት ዓመት ይሆናል ብለን ተስፋ እናደርጋለን።

በዚህም ምክንያት 2007ን የምንቀበለው በታላቅ ተስፋና ዝግጅት ነው። በ 2007 ነፃነትና አምባገነንነት፤ ዘረኛነትና አንድነት፤ እውነትና ውሸት፤ አድርባይነትና አርበኝነት፤ ዝርፊያና ንጽህና፤ ድህነትና ብልጽግና የሚፋጠጡበት ዓመት ይሆናል ብለን እንጠብቃለን። በአጭሩ 2007 የወሳኝ ትግል ዓመት ይሆናል።

ሁለት ሺህ ሰባት ዓመተ ምህረት፣ የኢትዮጵያ መፃዒ እድል የሚወሰንበት ዓመት በመሆኑ ሁላችንም በተነሳሳ የአርበኝነት መንፈስ እንድንቀበለው ግንቦት 7: የፍትህ፣ የነፃነትና የዲሞክራሲ ንቅናቄ ጥሪ ያደርጋል።

መልካም አዲስ ዓመት！

ድል ለኢትዮጵያ ሕዝብ ！

የኢትዮጵያውያን አዲስ አመት በመላ አገሪቱ እየተከበረ ነው

በአሉ በተለያዩ የአገሪቱ ክፍሎች እየተከበረ መሆኑን የሚደርሱን መረጃዎች ያመለክታሉ።

ኢትዮጵያውያን ስልክ በመደወል የመልካም ምኞት መግለጫ መልእክቶችም አስተላልፈዋል ከበአሉ ጋር በተያያዘ የተለያዩ የበጎ አድራጎት ስራዎች መከናወናቸውን  የደረሱን መረጃዎች ያሳያሉ። በበአሉ ዋዜማ ወቅት ከፍተኛ አደጋ የታየው በጋምቤላ ክልል በጎደሬ ዞን በጎሸም ቀበሌ ሲሆን፣ የመዠንገር ብሄረሰብ አባላት 9 ሰዎችን ገድለዋል። ግጭቱ አሁንም ድረስ የቀጠለ በመሆኑ የሟቾች ቁጥር ከዚህም በላይ ሊሆን ይችላል። ካለፉት 3 ወራት ጀምሮ በአካባቢው በመካሄድ ላይ ባለው ግጭት በርካታ ሰዎች ተገድለዋል። በሺዎች የሚቆጠሩ የደቡብ የአማራ፣ የጉራጌና የኦሮሞ ተወላጆች አካባቢውን ለቀው ተሰደዋል።

በሌላ ዜና ደግሞ በደቡብ ክልል በሰገን ወረዳ ከ100 ያላነሱ ወጣቶች ተይዘው መታሰራቸው ታውቋል። ወጣቶቹ ህዝቡን ለአመጽ ታነሳሳላችሁ ተብለው መታሰራቸው ታውቋል። ከ3 አመት በፊት 5 ብሄረሰቦች

በአንድ ላይ ሰገን የተባለ ዞን እንዲመሰርቱ የተደረገ ሲሆን፣ ወጣቶቹ ከፍትህና አስተዳደር ጋር በተያያዘ ጥያቄ ማንሳታቸው ለመታሰራቸው ምክንያት መሆኑን የአካባቢው ምንጮች ገልጸዋል፡፡

የባህር ዳሯ ሴት – የአቡጊዳ የአመቱ ሰው

የመብት፣ የዲሞክራሲ ፣ የሕግ የበለይነት፣ የነጻነትና የፍትህ ጥያቄ የጥቂት «ፖለቲከኞች» ወይም የፖለቲክ ፓርቲ መሪዎች ብቻ ጥያቄ አይደለም። የሚሊዮኖችም እንጂ።

መብታችንን አስረግጠን፣ ልእልናችንን አስደፍረን፣ በአገራችን እንደ ባሪያ የምንኖር ጥቂቶች አይደለንም። «የምትናገሩትን እኛ ነን የምንነግራችሁ። የሚጠቅማችሁን እኛ ነን የምናውቅላችሁ።በዚህ ሂዱ ስንላችሁ ትሄዳላችሁ፣ በዚህ ዉጡ ስንላችሁ ትወጣለች..» እያሉን፣ የግፍ ቀንበር በላያችን ላይ ጭነው፣ እኛ የኑሮ ዉድነት እያቃጠለን፣ እነርሱ ሚሊየነሮች ሲሆኑ ፣ እኛ ከመንደራችን ተፈናቅለን እነሱ በመንደራችን ቢዝነሳቸውን ሲገነቡ አይተን ዝም ብለን፣ በፍርሃት ካባ ተተብትበን ፣ ለአመታት ታስረን የተቀመጥን ጥቂቶች አይደለንም።

በ2006 ዓ.ም ግን፣ ምናልባትም የኢትዮጵያን ትንሳዔ መቃረብ የሚያመላክቱ አንዳንድ ክስተቶችን ለማየት ችለናል። ከነዚህም አንዱ የካቲት 16 ቀን 2006 ዓ.ም የሆነው ነው።

በባህር ዳር ከተማ ነው። አንድነት እና መኢአድ በጋራ በጠሩት ሰልፍ ፣ በከተማዋ ታሪክ ታይቶ የማይታወቅ ታላቅ ሕዝባዊ ማእበል ታየ። ከ250 ሺህ ነዋሪ ህዝብ አንድ ሶስተኛው፣ ወደ 80 ሺህ የሚጠጋው፣ ድምጹን ለማሰማት ወጣ። የፍህርትን ቀንበር ሰብሮ፣ «እምቢ ለአምባገነንነት፣ እምቢ ለጭቆና ፣ እምቢ ለዘረኝነት» እያለ ጮኸ።

ከሰልፈኞቹ መካከል፣ ከኋላ ወይንም ከዳር ሳይሆን ከፊት፣ በጀርባዋ ሕጻን ያዘለች አንዲት ሴት ትታያለች። ድምጿን ለማሰማት የማትፈራ ! ከአሁን ለአሁን ምን እባላለሁ ብላ ያልተሸማቀቀች ! «ሰው ያለነጻነቱ ምንድን ነው ?» እንደተባለው ለነጻነቷ የቆመች !! የዚች ሴት ፎቶ፣ በአለም ዙሪያ ሁሉ ተሰራጨ። ዳርና ጥግ ይዘን የተቀመጥን ብዙዎች ራሳችንን እንድንጠይቅ አደረገን። ሕሊናችንን ቆረቆረን። የአገር ጉዳይ የጥቂቶች ሳይሆን የእያንዳንዱ ኢትዮጵያ ጉዳይ እንደሆነ ይች ሴት አስተማረችን።

በአገራችን ታሪክ ሴቶች ትልቅ ሚና ሲጫወቱ በታሪክ አንብበናል። በዘመናችንም ተመልክተናል። እቴጌ ጣይቱ ፣ ጦር ሜዳ ድረስ በአዝማችነት በመዝመት ጀግንነት ምን ማለት እንደሆነ ያሳዩ የኢትዮጵያ እናት ናቸው። የዘመኑ ጣይቱዎችም ፣ እነ ርዮት አለሙ፣ ኤዶም ካሳዬ ፣ ማህሌት ፋንታሁን ለነጻነትና ለዲሞክራሲ ዋጋ እየከፈሉ ነው። የባህር ዳሯም ሴት፣ በራሷ መንገድ የጣይቱን ወኔ አሳይታናለች።

በአገራችን የሴቶች ተሳትፎ ምን ያህል ቁልፍ እንደሆነ ለማሳየት፣ ለለዉጥ የሚደረገዉም ትግል የጥቂቶች ሳይሆን የእያንዳንዱ ዜጋ መሆኑን ለማጉላት፣ እንዲሁም ዜጎች በእቴጌ ጣይቱ መንፈስ፣ እንደ ባህር ዳሯ ሴት፣ ለነጻነታቸውና ለመብታቸው ደፍረው መቆም እንዲጀምሩ ለማበረታታ፣ የልጅ እናት የሆነችዋን የባህር ዳሯን ሴት፣ የአመቱ ሰው አድርገን ስንመርጥ በታላቅ አክብሮት ነው።

“ትግልሽን አደንቃለሁ” በሚል በለምለም ጸጋው የተጻፈ ግጥም ለማንበብ እዚህ ይጫኑ

2007 የለዉጥ አመት ይሁንልን !

ሚሊየነሩ ጄ/ል (ከኢየሩሳሌም አርአያ)

ጄ/ል ዮሃንስ ገ/መስቀል

የሕወሐት ታጋይ ጄ/ል ዮሃንስ ገ/መስቀል ቦሌ ቴሌ መድሃኒያለም ባለ6 ፎቅ ህንፃ እንዳስገነቡ የቅርብ ምንጮች አጋለጡ።

ከ95ሚሊዮን ብር በላይ በሚደርስ ወጪ እንደተገነባ የተነገረለት ይኸው ባለ6 ፎቅ ዘመናዊ ህንፃ ለተለያዩ የግልና የመንግስት ባንኮች፣ ኢንሹራንስ ድርጅቶች፣ ንግድ ቤቶችና የተለያዩ ድርጅት ቢሮዎች እንደተከራየ የጠቆሙት ምንጮቹ በወር ከ2.1 ሚሊዮን ብር የሚገመት ኪራይ ጄኔራሉ እንደሚሰበስቡ አስታውቀዋል።

ሌ/ጄ ዮሃንስ በግላቸው ባለ6 ፎቅ ዘመናዊ ህንፃ በከፍተኛ ወጪ በማስገንባትና ከፍተኛ የኪራይ ሂሳብ በየወሩ በመሰብሰብ ከሌሎቹ በቢዝነስ ከተሰማሩ የሕወሐት/ኢህአዴግ ጄኔራል መኮንኖች የተለየ እንደሚያደርጋቸው ምንጮቹ አመልክተዋል። በአገር መከላከያ ሚኒስቴር የመረጃ ዋና መምሪያ ሃላፊ ሆነው ለረጅም አመታት ሲሰሩ የቆዩት የህወሐቱ ጄኔራል ዮሃንስ ገ/መስቀል ከ1995ዓ.ም ጀምሮ ከጄ/ል ሳሞራ የኑስ ጋር የከረረ ቅራኔ ውስጥ ገብተው እንደቆዩና በሁለቱ የህወሀት ጄኔራሎች መካከል የተፈጠረው ቅራኔ እየተባባሰ ሄዶ ጄ/ል ዮሃንስ ከሃላፊነት እንዲነሱ መደረጉን ያስታወሱት ምንጮቹ የሁለቱ ቅራኔ ሙስናን መሰረት ያደረገ እንደነበረ አስረድተዋል። (በወቅቱ ስለግጭታቸውና መለስ ዜናዊ ዘንድ ቀርበው ስለተነጋገሩት በኢትኦጵ ጋዜጣ መረጃው ይፋ ተደርጐዋል)  ጄ/ል ዮሃንስ ከመከላከያ ሃላፊነታቸው እንዲነሱ የተደረጉት በጄ/ል ሳሞራ መሆኑን ያስታወሱት ምንጮቹ በወቅቱ “ጡረታ” በሚል እንደተነሱና ሲነሱም በሜ/ጄኔራል ማእረግ እንደነበሩ አስታውቀዋል።

በሙስና ባገኙት በመቶ ሚሊዮን የሚገመት ገንዘብ ሕንፃ ወደማስገንባት የግል ቢዝነስ የተሰማሩት ጄ/ል ዮሃንስ ከአራት አመት በኋላ በመከላከያ የሌተና ጄኔራልነት ማእረግ ባሳለፍነው ሰኔ ወር ተሰጥቷቸው በደቡብ ሱዳን የሚሰማራውን የተመድ ሰላም አስከባሪ ሰራዊት በጦር አዛዥነት እንዲመሩ መመደባቸው አስገራሚ ነው ያሉት ምንጮቹ ምክንያቱም ጡረታ ተብለው የተሰናበቱት ዮሃንስ የሌተና ጄኔራል ማእረግ እድገት ተሰጥቷቸው መመለሳቸው በመከላከያ ታሪክ የመጀመሪያው ሊያደርጋቸው ስለሚችል ግርምት ሊፈጥር ችሏል ብለዋል። ዮሃንስ የአገር መከላከያ ሚ/ር የሌ/ጄኔራል ማእረግ እንዲሰጣቸውና በተመድ እንዲመደቡ የተደረገው በአሜሪካ ትእዛዝ መሆኑን ምንጮቹ አመልክተዋል። በቦሌ ለንደን ካፌ ፊት ለፊት ዘመናዊ መኖሪያ ካስገነቡት ጄኔራሎች አንዱ ናቸው።

(በፎቶው ጄ/ል ዮሃንስ ገ/መስቀል)