የረዳት ፓይለት ሃይለመድህን አበራ የአውሮፕላን ጠለፋ የአለም መነጋገሪያ በመሆን ቀጥሎአል

የኢትዮጵያ አየር መንገድ የበረራ ቁጥር 702 የሆነውን አውሮፕላን በመጥለፍ ጄኔቫ ስዊዘርላንድ ያሳረፈው ረዳት ፓይለት ሃይለመድህን አበራ እስካሁን ድረስ የጠለፋውን መንስኤና ምክንያት በግልጽ የመናገር እድል ባለማግኘቱ የአለም የመገናኛ ብዙሃን የተለያዩ አስተያየቶችን እየሰጡ ነው።

አንዳንዶች በኢትዮጵያ ውስጥ ያለው አስከፊ ጭቆናና ፓይለቱ አውሮፕላኑን እንዲጠልፍ እንዳነሳሳው ሲገልጹ ሌሎች ወገኖች ደግሞ ጥገኝት ለመጠየቅ ተብሎ ከተደረገ ስህተት ፈጽሟል ብለው ይተቻሉ።

ባህርዳር አካባቢ ተወልዶ ያደገው ሃይለመድህን አበራ በአንጻራዊ መልኩ ሀብታም ከሚባል ቤተሰብ መምጣቱን የሚናገሩት ፓይለቱንም ሆነ ቤተሰቦቹንም እናውቃለን የሚሉ የባህርዳርና የአካባቢው ሰዎች፣ ፓይለቱ በትምህርቱ እጅግ ጎበዝ የሚባልና ታታሪ ሰራተኛ እንደሆነ ይገልጻሉ።

አንድ ስሙ እንዳይገለጽ የፈለገ ሰው ሃይለመድህን በኢትዮጵያ አየር መንገድ ውስጥ ስላለው ቢሮክራሲና ዘረኝነት ደጋግሞ ይናገር እንደነበር ገልጿል።

ታናሽ እህቱ እንደሆነች የምትገልጽ ትንሳኤ አበራ በበኩሉዋ ሃይለመድህን ” የሰዎችን ደህንነት አደጋ ላይ ለመጣል አይደለም እንስሳትን ለመጉዳት የሚፈልግ ሰው አለመሆኑን፣  ከአገር ውጭ ወጥቶ ለመኖር ፍላጎት እንዳልነበረውም ገልጻለች።

በብሄራዊ መልቀቂያ ፈተናዎች ከፍተኛ ውጤት በማምጣት ትምህረቱን ያጠናቀቀው ሀይለመድህን የጀመረውን የ አርክቴክቸር ትምህርት ትቶ ወደ ፓይለትነት የገባው ለሙያው ካለው ፍቅር የተነሳ መሆኑንም ገልጻለች።

“ከቅርብ ጊዜ ወዲህ ህይወቱ ደስታ የራቀው መሰለ” የምትለው እህቱ፣ ስለሁኔታው ሲጠየቅ ” ጠላቶች እንዳሉ እንደሚያምን ፣ ስልኩን እንደጠለፉት እንደሚያስብ፤ በላፕቶፑ ካሜራ ሳይቀር ያዩኛል ብሎ ስለሚሰጋ ካሜራውን ሳይሸፍን እንደማይከፍት እንዲሁም፤ ወጥቶ እስኪገባ ቤቱን ሲበረብሩ የቆዩ ስለሚመስለው ካሜራ ጠምዶ መሄድ ሁሉ እንደጀመረ ገልጻለች።”

” ባጠቃላይ በታላቅ የመንፈስ ጭንቀት እየተሰቃየ ነው”፣ የምትለው እህቱ፣  የሚያሳዝነው ደግሞ ይህንን ጉዳቱን ለኛ ለቤተሰቡንኳ አብራርቶ አለመናገሩ ነው ” ብላለች።

ሌሎች ጓደኞቹ በበኩላቸው ሃይለመድህን የመንፈስ ጭንቀት ውስጥ የገባው አጎቱ ባለፈው ጥር ወር ላይ ማንነታቸው ባልታወቁ ሰዎች ከተገደሉ በሁዋላ ነው ይላሉ። አጎቱ ዶ/ር እምሩ ስዩም ባለፈው ጥር ወር ከስራ ሲወጡ ታክሲ ውስጥ ሞተው የተገኙ ሲሆን፣ ዶ/ሩን ማን እንደገደላቸው በውል ባይታወቅም፣ አንዳንድ ወገኖች ግን ግድያው ከፖለቲካ ጋር የተያያዘ ነው ይላሉ። አዲስ አበባ ዩኒቨርስቲ  በድረገጹ ላይ ባሰፈረው ሪፖርት የፕሮፌሰር  እምሩ  ስዩም ሞት አስገራሚ መሆኑን ገልጿል።

ሃይለመድህን ከአጎቱ ሞት በሁዋላ እርሱም በተመሳሳይ አደጋ ውስጥ እገኛለሁ ብሎ ሲሰጋ እንደነበር፣ በተለይም በአየር መንግዱ ውስጥ የተሰባሰቡት ካድሬዎች፣ ያሳድዱኛል ብሎ እንደሚያስብ ፓይለቱን ባለፈው ጥር ወር ላይ እንዳገኘው የሚገልጽ ወጣት ለኢሳት ተናግሮአል።

የኢትዮጵያ አየር መንገድ የተጠለፈበትን ምክንያት ለማወቅ የሚደረጉ እንቅስቃሴዎች እንደቀጠሉ ነው

አየር መንገዱ ከአዲስ አበባ ወደ ሮም ጣሊያን በማምራት ላይ በነበረበት ጊዜ  ረዳት አብራሪው የጉዞውን አቅጣጫ በመቀየር ጄኔቭ አውሮፓላን ማረፊያ በማሳረፍ እጁን ለፖሊስ ሰጥቷል።

የኢትዮጵያ መንግስት የኮሚኒኬሽን ባለስልጣን የሆኑት ሬድዋን ሁሴን አየር መንገዱ የተጠለፈው ሱዳን በቆመበት ጊዜ በተሳፈሩ ማንነታቸው ያልታወቁ ሰዎች ነው በማለት መጀመሪያ ላይ ለረዩተርስ መግለጫ ቢሰጡም፣ የስዊዘርላንድ ፖሊስ ግን ፈጥኖ ጠላፊው የአየር መንገዱ ረዳት አብራሪ መሆኑንና የደህንነት ስጋት እንዳለበት በመግለጽ እጁን በሰላም መስጠቱን አስታውቀዋል።

በአለም የጠለፋ ታሪክ ያልተመደ ክስተት ነው የተባለው ይህ የአውሮፕላን ጠለፋ፣ የፖለቲካ ይዘት ያለው ሳይሆን እንደማይቀር ይገመታል።

ማንነቱ ያልታወቀው ረዳት ፓይለት በ30 ዎቹ የእድሜ ክልል ውስጥ የሚገኝ ሲሆን፣ ጄኔቭ አውሮፕላን ማረፊያ እንደደረሰ በመስኮት በኩል በመውጣት እጁን በሰላም ለፖሊስ ሰጥቷል። ፖሊስ እንዳስታወቀውም ጠላፊው ምንም አይነት የጦር መሳሪያ አልያዘም።

በአውሮፕላኑ ውስጥ በነበሩ ተሳፋሪዎች ላይ ምንም አይነት ጉዳትም አልደረሰም።

ጄኔቭ የሚገኘው የኢሳት ወኪል እንደዘገበው ምንም እንኳ ጄኔቫ አየር ማረፊያ ከሰአታት በሁዋላ ተራግገቶ ስራውን ለማከናወን የቻለ ቢሆንም፣ በኢትዮጵያ ሰአት አቆጣጠር እስከ ቀኑ 9 ሰአት ድረስ ተሳፋሪዎች ወደ ሮም አልተመለሱም፣ አውሮፕላኑም ባለበት ቆሞ ይታይ ነበር። ከቀኑ 9 ሰአት ከሰላሳ አካባቢ አውሮፕላኑ ለጥገና ወይም ተሰፋራዎችን ወደ ሮም ለመመለስ ሲንቀሳቀስ መታየቱን ወኪላችን ገልጾ፣ ጠላፊውን ለማግኘት የተደረገው ሙከራ በፖሊስ ጥብቅ ቁጥጥር የተነሳ ሊሳካ አልቻለም።

የኢትዮጵያ አየር መንገድ ሰራተኞች በተለያዩ ጊዜያት በአስተዳደሩ እንደሚማሩ ይታወቃል። አለማቀፍ የመገናኛ ብዙሀን በኢትዮጵያ ውስጥ የሚታየውን የሰብአዊ መብቶች ጥሰት በማንሳት ጠለፋውን ከፖለቲካ ጋር በማያያዝ ለማየት እየሞከሩ ነው።

ረዳት ፓይለቱ አላማው ጥገኝነት መጠየቅ ቢሆን ኖሮ አውሮፕላኑን ሮም ላይ ካሳረፈ በሁዋላ ጄኔቭ ገብቶ በሰላም እጁን መስጠት ይችል እንደነበር ጁኔቭ የሚገኙ አንዳንድ አስተያየት ሰጪ ይናገራሉ።  ረዳት ፓይለቱ ይህ እድል እያለው እና አውሮፕላን መጥለፍ ወንጀል መሆኑን እያወቀ እንዲህ አይነት እርምጃ ለመውሰድ የተነሳሳው አንድ ከባድ ምክንያት ቢኖረው ነው በማለት እኝሁ አስተያየት ሰጪ ገልጸዋል።

በስዊዝ የሚገኙ ኢትዮጵያውያን ጠበቆች ረዳት ፓይለቱን ለማግኘትና ጠበቃ ቐጥረው ለመከራከር ፍላጎት እንዳላቸው ለኢሳት ገልጸዋል።

ስቱዲዮ ከመግባታችን በፊት በአውሮፕላኑ ወስጥ ተሳፍራ የነበረች አንዲት ወጣት አግኝተናል። ወጣቱዋ እንደምትለው አውሮፐላኑ የተጠለፈው ከሮም ወደ ሚላን በሚመበርበት ጊዜ ነው። ሮም ማረፉንና መንገደኞችን ማሳፈሩን ወጣቷ ተናግራለች። አቶ ሬድዋን በበኩላቸው አውሮፐላኑ ሮም ሳያርፍ ወደ ጄኔቭ መሄዱን ተናግረዋል። ወጣቱዋ አብራሪው ረጅም ና ጠይም መሆኑንሮም ላይ ሻንጣውን ማውረዱንና ፊቱ ላይ አለመረጋጋት ይታይበት እንደነበር ገልጻለች።

ከወጣቱዋ ጋር ያደረግነው ቃለምልልስ እንደሚከተለው ይቀርባል።

የቡና ኤክስፖርት ለሙስናና ብልሹ አሰራር ተጋልጧል

ቡናን ኤክስፖርት ከማድረግ ጋር በተያያዘ በክትትልና ቁጥጥር፣ በመረጃ አያያዝ፣ ያለብሔራዊ ባንክ ፈቃድ ቡናን ወደውጭ ኤክስፖርት ከማድረግ እና በሁሉም አካባቢ የቡና ድርጅቶችን መጋዘኖች ክምችት ቆጠራ በወቅቱ ባለማድረግ ላይ ክፍተቶች እንደሚስተዋሉ የፌደራል የሥነምግባር እና የፀረ-ሙስና ኮሚሽን ያጠናው አንድ ጥናት አመለከተ፡፡

ጥናቱ  ኤክስፖርት በማያደርጉ ድርጅቶች ላይ እርምጃ ያለመውሰድ፣ በንግድ ፈቃድ ላይ የተጠናከረ ቁጥጥር ያለማድረግ እና በሕገወጥ የቡና ምርት ዝውውርና ግብይት ላይ የሚመለከታቸው አካላት ተቀናጅተው ያለመስራት በዘርፉ የሚታዩ ችግሮች መሆናቸውን ማመላከቱን ኮምሽኑ በድረገጹ ላይ ባሰፈረው ዜና ገልጿል፡፡

ኢትዮጵያ ከፍተኛ የውጭ ምንዛሪ ከምታገኝባቸው የግብርና ምርቶች መካከል በቀዳሚነት የሚጠቀሰው የቡና ኤክስፖርት ሒደት ለሙስናና ብልሹ አሠራር ያለውን ተጋላጭነት አስመልክቶ በኮሚሽኑ የተካሔደው ጥናት ይፋ የሆነው ጉዳዩ የሚመለከታቸው አካላት በተገኙበት ሰሞኑን በግዮን ሆቴል ጥናቱን ለማዳበር በተከናወነ የምክክር ስብሰባ ላይ ነው፡፡

የውይይት መድረኩ የተዘጋጀበት ዓላማ በዘርፉ ስለሚስተዋሉ የአሠራር ጉድለቶች ለሚመለከታቸው ክፍሎች ግልጽ ግንዛቤ ለማስያዝና ችግሮቹን በመቅረፍ ረገድ የተሻለ አሠራር በማመላከት የመፍትሔው አካል ሆነው የድርሻቸውን እንዲወጡ ለማስቻል እንዲሁም በክፍተቶቹ ዙሪያ የጋራ ግንዛቤ በመያዝ ለመፍትሔው በጋራ ለመንቀሳቀስ ነው ተብሎአል፡፡

አገሪቱ ከቡና ኤክስፖርት የምታገኘው ገቢ በተለይ ባለፉት ሶስት ዓመታት ማሽቆልቆሉ የሚታወቅ ሲሆን ችግሩ ከዚህ ዓይነቱ ሙስናና ብልሹ አሰራር ጋር በቀጥታ ይያያዝ ፣አይያዝ የተገለጸ ነገር የለም፡፡

በርካታ የየረር ጎሳ አባላት የአገር ሽማግሌዎች ታሰሩ

በሶማሊ ክልል በቀላፎ አካባቢ የሚኖሩ 19 የየረር ባሬ ጎሳ የአገር ሽማግሌዎች በክልሉ ውስጥ የተፈጸመውን ከፍተኛ እልቂት ለጠ/ሚንስትሩ አቤት ለማለት ወደ አዲስ አበባ በሄዱበት ወቅት  አካባቢውን በሚጠብቁ ልዩ ሃይሎች ተይዘው መታሰራቸውን ከስፍራው የደረሰን መረጃ አመልክቷል።

ከእስር ያመለጡ አንዳንድ ሽማግሌዎች በትናንትናው እለት ወደ አዲስ አበባ በመሄድ ከዚህ ቀደም በልዩ ሚሊሺው በቀጥታ የተገደሉትን የ47 ሰዎች ስም  ፣ ከቆሰሉ በሁዋላ በህክምና እጦት የሞቱትን የ 17 ሰዎች ስም እንዲሁም ከ100 በላይ ቁስለኞችን እና የታሰሩትን ሰዎች ስም ዝርዝር የያዘውን ደብዳቤ ለቀድሞው የኢትዮጵያ ሰብአዊ መብቶች ጉባኤ፣ በአሁኑ አጠራር ለሰብአዊ መብቶች ጉባኤ ፣ በመንግስት እንደሚደገፍ ለሚነገርለት ለኢትዮጵያ የሰብአዊ መብቶች ኮሚሽን፣ ለእንባ ጠባቂ እና በድጋሜ ለጠ/ሚንስትር ጽ/በት አስገብተዋል።

በደብደቤያቸው ላይ ለጠ/ሚንስትር ሃይለማርያም ደሳለኝ ያስገቡትን ደብዳቤ ቁጥር በመጥቀስ ፣ ጠ/ሚንስትሩ እስካሁን መልስ እንዳልሰጡዋቸው በደብዳቤያቸው ላይ ገልጸዋል።
የአገር ሽምግሌዎቹ ለጠቅላይ ሚኒስትሩ በጻፉት ደብዳቤ የሶማሊ ክልል ፕሬዚዳንት አብዲ ሙሀመድ ኡመር እና ጄኔራል አብርሀም በቅጽል ስማቸው ኳታር የሚመራው ልዩ ሚሊሺያ እየተባለ የሚጠራው ሀይል ታህሳስ 1 እና 2 በከፈተው ተኩስ በትምህርት ላይ

የነበሩ ህጻናትንና ወጣቶችን ጨምሮ 47 ሰዎችን መግደሉን የሟቾቹን ስም ዝርዝር በመጥቀስ መግለጻቸውን መዘገባችን ይታወቃል።

 
ልዩ ሚሊሺያው ተማሪዎች በትምህርት ላይ እንዳሉ ተኩስ መክፈቱን የአገር ሽማግሌዎቹ በደብዳቤያቸው ላይ የገለጹ ሲሆን፣ የፌደራሉ መንግስት በአስቸኳይ ደርሶ እንዲታደጋቸውም ጠይቀዋል።

የየረር ባሬ ጎሳ አባላት የክልሉ መንግስት እንደ ተወላጅ ባለመቁጠር ጭቆና እንደሚያደረስባቸው በመግለጽ ራሳቸውን የማስተዳደር መብት እንዲሰጣቸው ሲጠይቁ ቆይተዋል።
ከዚሁ ጋር በተያያዘ በክልሉ መንግስት ልዩ ሚሊሺያዎችና በየረር ባሬ ጎሳ አባላት መካከል ተደጋጋሚ ግጭት ሲደረግ ከቆየ በሁዋላ ሰሞኑን መሳሪያ ለማስፈታት ወደ አካባቢው የተጓዘው የክልሉ ልዩ ሚሊሺያ ሃይል ካፍ እየተባለ በሚጠራው ትምህርት ቤት ላይ በከፈተው ተኩስ ህጻናትንና ሴቶችን ጨምሮ 47 ሰዎች መገደላቸውን ፣ ጥር 11 በተቀሰቀሰው ግጭት ደግሞ  ከ100 በላይ ሰዎች መቁሰላቸውንና 17 ሰዎች በህክምና እጦት መሞታቸውን ስማቸው እንዳይጠቀስ የፈለጉ የብሄረሰቡ ተወካይ ለኢሳት ገልጸው ነበር።


ዜናው በኢሳት መተላለፉን ተከትሎ የሚሊሺያ ሃይሉ በሶስተኛው ቀን 16 የአገር ሽማግሌዎችን ይዞ ማሰሩንም መዘገቡ የሚታወስ ሲሆን፣ ባለፉት 6 ቀናት የታሰሩትን የአገር ሽማግሌዎች ጨምሮ እስካሁን ከ35 በላይ የብሄረሰቡ ተወካዮች ታስረዋል።

የክልሉን ፖሊስ ኮሚሽነር ለማነጋገር ተደጋጋሚ ጥረት ብናደርግም ሊሳካልን አልቻለም።

በሀገረ-ማርያም ከተማ የተነሳውን ተቃውሞ ተከትሎ በርካታ የሀገር ሽማግሌዎች ታሰሩ

በአርሴማ ቤተክርስቲያን የተነሳውን የውስጥ ችግር ተከትሎ ችግሩን ለመፍታት የተመረጡት የሰበካ ጉባኤ አባላት ታስረዋል።

በህዝቡ የተመረጡት 15ቱ ሽማግሌዎች ችግሩን ለመፍታት በሚንቀሳቀሱበት ጊዜ የቀጠናው ሃላፊ የሆኑት አቡነ ገብርኤል የሰበካ ጉባኤ አባላቱ እንዲበተኑና ችግሩን ለመፍታት እንደሚሞክሩ መግለጻቸው ህዝቡን አስቆጥቷል። ጳጳሱ  ለፌደራል ፖሊሶች በማመልከት የአገር ሽማግሌዎች እንዲታሰሩ ማድረጋቸውን የሚናገሩት የአካባቢው ነዋሪዎች፣ ዛሬ ጳጳሱ ወደ አካባቢው በመሄድ ንግግር ሊያደርጉ ሲሞክሩ ህዝቡ የታሰሩት የሰበካ ጉበኤ አባላት ካልተፈቱ ምንም አይነት ምክንያት አንሰማም በማለት ተቃውሞ አሰምቷል። ጳጳሱም ሰዎቹ የታሰሩት በፖለቲካ ምክንያት ነው በማለት ለማረጋጋት ቢክሩም ህዝቡ ግን አሁንም የሚቀበላቸው አልሆነም። የቤተክርስቲያን ደወል በመደወል ወደ ፍትህ ቢሮ ያመራው የከተማው ነዋሪ፣ ሰዎቹ ካልተፈቱ በተቃውሞአቸው እንደሚገፉበት አስጠንቅቀዋል።

የፌደራል ፖሊስ በበኩለ ማንኛውም ሰው ተቃውሞ ለማሰማት ሙከራ ቢያደርግ እርምጃ እንደሚወሰድ አስጠንቅቋል። እስካሁን በቁጥጥር ስር የዋሉት 11 ዱ የአገር ሽማግሌዎች  ፍርድ ቤት ቀርበው የ14 ቀን የጊዜ ቀጠሮ ተጠይቆባቸዋል።

ወደ ስቱዲዮ ከመግባታችን በፊት በደረሰን ዜና ደግሞ ጳጳሱ ዛሬ ረቡእ በድጋሜ ከህዝቡ ጋር የተገናኙ ቢሆንም፣ ህዝቡ መሪዎቻችን ሳይፈቱ ምንም አይነት ውይይት አይኖርም የሚል አቋም በመያዙ፣ አቡነ ገብርኤል የሃገር ሽማግሌዎች እንዲፈቱ ጠይቀዋል። የጳጳሱን ጥያቄ በመቀበል የከተማው ባለስልጣናት ሰዎቹን ለመፍታት ቢሄዱም፣ የአገር ሽማግሌዎች በበኩላቸው ወንጀል ስራተችሁዋል ተብለን የታሰረን በመሆኑና ፍርድ ቤትም የጊዜ ቀጠሮ ለ14 ቀናት የጠየቀብን በመሆኑ፣ ፍርድ ቤት ቀርበን ጥፋታችን ሳይነገረን አንፈታም በማለት ከእስር ለመውጣት ፈቃደኛ ሳይሆኑ ቀርተዋል።

ባለስልጣኖቹም የፍርድ ቤት ቀጠሮው አጥሮ እስረኞች ነገ ፍርድ ቤት እንዲቀርቡ እንደሚያደርጉ ታውቋል። የእስረኞች መፈታት የተፈጠረውን ችግር ያበርደዋል ተብሎ ይጠበቃል።

አውራ የኢህአዴግ ፓርቲዎች አዳጊ ክልሎችን ለማስተዳደር ስልጣን ተሰጣቸው

Add caption

ኢህአዴግ እየተባለ የሚጠራውን ግንባር የመሰረቱት 4ቱ ፓርቲዎች ህወሃት፣ ብአዴን፣ ኦህዴድና ደኢህዴን አዳጊ ክልሎች እየተባሉ የሚጠሩትን ቤንሻንጉል ጉሙዝ፣ ጋምቤላ፣ ሃረሪ፣ ድሬዳዋ፣ ሶማሊና አፋር ክልሎችን ለማስተዳደርና በበላይነት ለመምራት መከፋፈላቸውን ከኢህአዴግ ፅ/ቤት የተገኘው የውሰጥ መረጃ አመለከተ።

በኢትዮጵያ ህገ መንግስት አንቀጽ 52 ክልሎች ራስን በራስ የማስተዳደር ስልጣን የተሰጣቸው ሲሆን፣ ስልጣናቸውን ተጠቅመመውም የክልሉን የኢኮኖሚ፣ የመህበራዊና የልማት ፖሊሲ ስትራቴጂና እቅድ የማውጣት ስልጣን ተሰጥቷቸዋል።

ይሁን እንጅ የፌደራሉ መንግስት እራሱ በሚወክላቸው አስፈጻሚዎችን አዳጊ የተባሉትን ክልሎች በተዘዋዋሪ መንገድ ሲያስተዳደር ቢቆይም፣ አሁን ግን ግንባሩ አዳጊ ክልሎችን በመከፋፈል ለማስተዳደር ውሳኔ ላይ መድረሱን የውስጥ ምንጮች ገልጸዋል።

በዚህ አዲስ የስልጣን ድልድል መሰረት አዳጊ ክልሎች ያለ አውራ ፓርቲዎች እውቅና ምንም አይነት ፖለቲካዊና ኢኮኖሚያዊ እንቅስቃሴዎችን አያደርጉም።

አፋር ክልልን የሚያስተዳድረው አፍዴፓ በህወሃት ስር ሆኖ የአፋር ክልልን የሚያስተዳድር ሲሆን፣ በክልሉ ምክር ቤት ስብሰባ ወቅትም የትግራይ ክልል ፕሬዚዳንትና ምክትላቸው ይገኛሉ። በትግራይ ክልል የምክር ቤት ስብሰባ ወቅት ግን የአፋር ክልል ፕሬዚዳንት እና ምክትላቸው አይገኙም።

ኦሮምያን የሚያስተዳድረው ኦህዴድ በበኩሉ በህወሃት ደጋፊነት የሶማሊ ክልልን የማስተዳደር ሃላፊነት ሲሰጠው ፣ ሶማሊ ክልል በበኩሉ በኦህዴድ እየታገዘ ድሬዳዋን ያስተዳድራል።

የአማራውን ክልል የሚመራው ብአዴን በበኩሉ በአቶ ደመቀ መኮንን በሚሰጥ ውሳኔ የቤንሻንጉል ጉሙዝን እንደሚያስተዳድር ታውቋል። የቤንሻንጉል ጉሙዝ ፖለቲካዊም ሆነ ኢኮኖሚያዊ እንቅስቃሴዎችን በተመለከተ ግንኙነቱ ከብአዴን ጋር ይሆናል።

ኢህአዴግ የወሰደው ፖለቲካዊ እርምጃ በአዳጊ ክልሎች ውስጥ የሚፈጥረው የተለየ ስሜት እንደማይኖር የውስጥ ምንጮች ይገልጻሉ። ቀደም ብሎ አዳጊ ክልሎች በፌደራል ባለስልጣናት ጣልቃ ገብነት ይተዳደሩ እንደነበር የሚጠቅሱት እነዚሁ ምንጮች፣ አሁን ዋናዎቹ ክልሎች አዳጊ ክልሎችን በመከፋፈል ለማስተዳደር በመወሰናቸው አዳጊ ክልሎች የሚያሰሙት ተቃውሞ አይኖርም ብለዋል።

በአዲስ አበባና በክልል ከተሞች የቤንዚን እጥረት ተከሰተ

የቤንዚንና የናፍጣ እጥረቱ በመላ አገሪቱ የተከሰተ ሲሆን በተለይም በአዲስ አበባ፣ በሶማሊ ክልል በጂጂጋ፣ ሀረርና ሌሎችም ከተሞች፣ በደቡብ ደግሞ በሃዋሳ ፣ ሆሳዕና ፣ ወላይታ ሶዶ እና ሚዛን አማን መከሰቱን የደረሰን ዜና ያመለክታል። በጅጅጋ ከሁለት ቀናት በሁዋላ  ነዋሪዎች ነዳጅ ለመቅዳት ሲጋፉ ታይቷል።

ችግሩ የነዳጅ አከፋፋይ ኩባንያዎች ሀላፊነታቸውን በአግባቡ ባለመወጣታቸውና ነዳጁን ማከፋፈል በማቆማቸው የተፈጠረ ነው በማለት የንግድ ሚኒስትሩ ተናግረዋል።

የኦይል ሊቢያ 48 ያህል ተሽከርካሪዎች ወደ ሌሎች ኩባንያዎች በመሄዳቸው ፤ የነዳጅ አቅርቦት እጥረቱ ከተሽከርካሪ እጥረት ጋር ተያይዞ መምጣቱንም ሚኒስትሩ ገልጸዋል።

ሚኒስትሩ ” የአንዳንድ የነዳጅ ኩባንያዎች ድርጊት በትራንስፖርት እንቅስቃሴው ላይ አሉታዊ ተፅዕኖ ከመፍጠር በዘለለ ክፍለ ኢኮኖሚውን በእጅጉ የሚጎዳ በመሆኑ ፤ ይህን ድርጊት በሚፈፅሙ ኩባንያዎች ላይ አስፈላጊውን እርምጃ ሁሉ መንግስት ለመውሰድ እንደሚገደድ” ገልጸዋል። አከፋፋዮች በበኩላቸው ምንም አይነት ነዳጅ እንዳልቀረበላቸው እየገለጹ ነው።