በውጥረት የተጀመረው የቅዱስ ሲኖዶስ ጉባዔ በሰላም ተጠናቀቀ

በኢትዮጵያ አቆጣጠር በ2007 የሚደረገው የጥቅምት ወር የቅዱስ ሲኖዶስ ጠቅላላ ጉባዔ በሰላም እና በስምምነት ተጠናቋል። ቀደም ሲል ማህበረ ቅዱሳንን ለማሳጣት እና በአሸባሪነት ለመወንጀል፤ በፓትርያርኩ አማካኝነት በተጠራው ስብሰባ ላይ ክፋት ያለው ንግግር ሲያደርጉ የነበሩ ሰዎች ቤተ ክርስቲያናዊ ቅጣት ደርሶባቸዋል። ፓትርያርኩም ቢሆኑ፤ በመጨረሻ የቅዱስ ሲኖዶሱን ወቀሳ ተቀብለው፤ “እሺ ከናንተ ቃል አልወጣም።” ይበሉ እንጂ፤ ለዚህ ሁሉ የዳረጋቸውና ልዩ ጸሃፊያቸው የነበረው ንቡረ ዕድ ኤልያስ አብርሃ እንዲባረር የሚል ሃሳብ ሲቀርብ “እኔን ብታባርሩኝ ይሻላል፤ በፍጹም አይሆንም።” በማለታቸው ለግዜው የልዩ ጽሃፊያቸውን ጉዳይ ወደጎን በመተው በሌሎቹ የቤተክርስቲያኗ አማሳኞች ላይ ቅጣት አሳልፈው ጉባዔው በሰላም እና በጸሎት ሲከናወን ነበር የሰነበተው።

የኢትዮጵያ ኦርቶዶክስ ተዋህዶ ቤተ ክርስቲያን የቅዱስ ሲኖዶስ አባላት

የቅዱስ ሲኖዶሱን የስብሰባ ሂደት በቅርብ ይከታተል የነበረው “ሐራ ዘተዋሕዶ” የተባለው ድረ ገጽም የጉባዔውን የመጨረሻ ውሎ ዘግቧል። በኛ በኩል የመግለጫውን ኮፒ አስቀድመን፤ ከዚያ በመቀጠል ለዝርዝር ዘገባው የ”ሐራ ዘተዋሕዶ”ን ሙሉ ዜና መልሰን ለናንተ አቅርበነዋል።

የቅዱስ ሲኖዶስ ውሳኔ ጋዜጣዊ መግለጫ

የቅዱስ ሲኖዶስ ዓመታዊ ምልአተ ጉባኤ ተጠናቀቀ

ውጥረት በተመላበት ኹኔታ ተጀምሮ ተጋግሎ የሰነበተውና በመጨረሻም ወደ መግባባትና አንድነት የመጣው የቅዱስ ሲኖዶስ ምልአተ ጉባኤ÷ ለኹለት ሱባዔ ያኽል ሲያካሒድ የቆየውን የመጀመሪያ ዓመታዊ መደበኛ ስብሰባውን ነገ፣ ጥቅምት ፳፯ ቀን ፳፻፯ ዓ.ም. ከቀትር በፊት አጠናቋል፡፡