ፍርድ ቤቱ በእነ ሐብታሙ ጉዳይ ጠንከር ያለ ትዕዛዝ አስተላለፈ

ዛሬ ሳምንት ማክሰኞ በቁጥጥር ስር እንዲውሉ የተደረጉት የአንድነት ፓርቲ ከፍተኛ አመራሮች ህገ መንግስቱና የጸረ ሸብር አዋጁ በሚያዙት መሰረት እጃቸው ከተያዘበት አንስቶ በ48 ሰዓት ውስጥ ፍርድ ቤት መቅረብ እንደሚገባቸውና በቤተሰቦቻችውና በጠበቃቸው መጉብኘት መብታቸው መሆኑን ከግምት በማስገባት ጠበቆቻቸው ያልተሟሉላቸው መብቶች በፍርድ ቤት ጣልቃ ገብነት ይከበሩ ዘንድ በዛሬው ዕለት ክስ መስርተው የማዕከላዊ አመራሮች ለቀረበባቸው ክስ በአካል በመገኘት ምላሽ ሰጥተዋል፡፡

ሃላፊዎቹ ለፍርድ ቤቱ በሰጡት ምላሽ ሰዎቹን ፍርድ ቤት በ2/11/2006 ዓ.ም ማቅረባቸውን ጠቅሰዋል፡፡የታሳሪዎቹ ጠበቆች የሆኑት ጠበቃ ተማም አባቡልጉና አቶ ገበየሁ ደምበኞቻቸውን ማግኘት አለመቻላቸውን ፍርድ ቤት ሲቀርቡም እንዲያውቁ አለመደረጋቸውን አስረድተዋል፡፡ጠበቆቹ ደምበኞቻቸውን ማየት እንዲፈቀድላቸውና በቤተሰቦቻቸውም እንዲጎበኙ እንዲደረግ ትዕዛዝ እንዲሰጥ አቤት ብለዋል፡፡

ፍርድ ቤቱ ግራ ቀኙን ካደመጠ በኋላ ታሳሪዎቹ በቤተሰቦቻቸው እንዲጎበኙ እንዲደረግና ከጠበቆቻቸው እንዲመካከሩ ይደረግ ሲል ትዕዛዝ ሰጥቷል፡፡ፍርድ ቤቱ ከዚሀ በተጨማሪም በማዕከላዊ እንደሚገኙ የተነገረላቸውን ታሳሪዎች የፊታችን አረብ 4፡00 እንዲቀርቡ ሲል አዟል፡፡የማዕከላዊ ኃላፊም በፍር ቤቱ የተሰጠውን ትዕዛዝ መፈጸሙን እንደሚከታተሉ ተናግረዋል፡፡

ቆይታ ከአንዳርጋቸው ጽጌ እህት ጋር!

ከእስከዳር ጋር የሚኖረኝ ቀጠሮ የአሁኑን የአንዳርጋቸው ጽጌን ጉዳይ ለመነጋገር ቢሆንም፤ ሳልወድ በሃሳብ ወደኋላ እንድመለስ መገደዴ አልቀረም። በምርጫ 97 ወቅት (ከዘጠኝ አመታት በፊት) አንዳርጋቸው ጽጌ በየእለቱ ወደ ቅንጅት ቢሮ በማምራት የማደራጀት እና የቅስቀሳ ስራዎችን ያከናውን ነበር። የሰኔ የመጀመሪያ ሳምንት ግን ወጣቶች መንገድ ላይ የሚረሸኑበት፤ የቅንጅት ደጋፊዎች የተባሉ ሰዎች በገፍ እየታፈኑ ወህኒ ያሚጋዙበት ወቅት ሆነ።

አንድ ቀን ለአንዳርጋቸው ጽጌ ስልክ ተደወለለት። ጓደኛው ዶ/ር ስለሺ ነበር። “ተገናኝተን ቡና እንጠጣ” አለውና አንዳርጋቸው ከቤት ወጣ። እንደወጣም ቀረ – አልተመለሰም። መንገድ ላይ የጠበቁት የወያኔ ደህንነት አባላት ዶ/ር ስለሺን ጨምረው ወደ ዝዋይ እስር ቤት ወሰዷቸው። (ሙሉውን ጽሁፍ ለማንበብ እዚህ ላይ ይጫኑ)

አብርሃ ደስታ – ከትግራይ አዲስ አበባ ማዕከላዊ እስር ቤት ገባ

በትግራይ የሚደረጉ ወቅታዊ ጉዳዮች ላይ በመጻፍ እና በመተቸት ይታወቃል – አብርሃ ደስታ። በትጋይ የሚገኙት ሰዎች የአብርሃ ደስታን ሃሳብ – በሃሳብ ማሸነፍ ሲያቅታችው አስረውታል። ከታሰረ በኋላ ወዴት እንደተወሰደ ለማወቅ አልተቻለም ነበር። ዛሬ ያገኘነው መረጃ ግን አብርሃ ደስታ ከትግራይ ወደ አዲስ አበባ ማዕከላዊ እስር ቤት ተዛውሮ እንደሚገኝ ለማወቅ ችለናል።\

ይህ በ እንዲህ እንዳለ፤ በሚቀጥለው ሳምንት እሁድ በራያ እና አዘቦ የሚደረገውን የአረና ፓርቲ ስብሰባ፤ “ዘመቻ አብርሃ ደስታ” ማለታቸውውን አሳውቀዋል። አረና የትግራይ ፓርቲ እንደገለጸው ከሆነ፤ ዓረና-መድረክ እሁድ 06 / 11 / 2006 ዓ/ም በራያ ዓዘቦ ወረዳ ሞኾኒ ከተማ “ዘመቻ ኣብረሃ ደስታ” የሚል መፈክር ያለበት ህዝባዊ ስብሰባ ያካሂዳል።
ዓረና-መድረክ ፖሊሲው፣ ስትራተጂውና ኣማራጭ ሃሳቡ ከራያ ዓዘቦና ኣከባቢው ህዝብ ለመወያየትና ለማስተዋወቅ ህዝባዊ ስብሰባ ጠርተዋል።
ዓረና-መድረክ የሃገራችን የፍትህ፣ ዲሞክራሲ፣ መልካም ኣስተዳደር፣ ሁላቀፍ ልማት፣ የሚድያ ነፃነት፣ ወዘተ ተግዳረቶች በማቅረብ ለነዚህ ችግሮች መፍትሄ ኣማራጭ ሃሳቦች በማቅረብ ወደፊት ሃገራችን የምትመራበት ዲሞክራሲያዊ ስርዓት ምን መምሰል እንዳለበት፣ ሰለማዊ የስልጣን ሽግግር እውን የሚሆንበት ኣግባብ፣ ባለፈው 17 የትጥቅ ትግል የተከፈለ መስዋእትነትና በኣሁኑ ሰዓት የተገኘው ለውጥ ምን እንደሚመስል ከራያ ህዝ ጋብ እንወያያለን።

የተጣረሰ ትዕዛዝ የሚስተናገድበት ‹‹ፍርድ ቤት›› – በሌሉበት መዝገቡ ተዘጋ (ጽዮን ግርማ)

ሁለት ወር ከሃያ ቀናት በእስር ያሳለፉት ስድስቱ ጦማሪያንና (Bloggers) ሦስቱ ጋዜጠኞች በሦስት የጊዜ ቀጠሮ መዝገብ በሰንበት ፍርድ ቤት ሲመላለሱ ከርመው በዛሬው ቀጠሮ በሌሉበት መዝገቡ ለዐቃቤ ሕግ መተላለፉ ተነገረ፡፡ለዛሬ ቅዳሜ ሐምሌ 5 ቀን ተቀጥረው የነበሩት ጋዜጠኛ ተስፋዓለም ወልደየስ፣ ጋዜጠኛ አስማማው ኃይለ ጊዮርጊስና፣የሕግ መምሕርና የዞን ዘጠኝ ጦማሪ ዘለዓለም ክብረት ፣ጋዜጠኛ ኤዶም ካሳዬና የዞን ጦማሪዎቹ ናትናኤል ፈለቀና አጥናፉ ብርሃነ በአጠቃላይ ስድስቱ ተጠርጣሪዎች ፍርድ ቤት ይቀርባሉ ብሎ እስከ ጠዋቱ አምስት ሰዓት ተኩል ድረስ ሲጠብቅ የነበረው ችሎት ተከታታይ በመጨረሻም ችሎቱ ማብቃቱ ተነግሮታል፡፡

—————

ግንቦት ዘጠኝ-

በፌደራል የመጀመሪያ ደረጃ ፍርድ ቤት አንደኛ ወንጀል ችሎት ነው፡፡ ግንቦት ዘጠኝ ቀን 2006 ዓ.ም እያንዳንዱ እስረኛ ቤተሰቡን እዲያስገባ ተፈቅዶለት ነበርና ተስፋለዓለም ችሎት እንድታደም ስሜን በማስተላለፉ በጠባቧ ችሎት ቁጭ ብያለኹ፡፡ የዕለቱን የቀጠሮ መዝገብ ለመመልከት የተሰየሙት ወጣት ዳኛ ‘በእነ አጥናፉ መዝገብ’ በማለት የሦስቱ ተጠርጣሪዎች የአጥናፉ ብርሃነ፣ለናትናኤል ፈለቀና ኤዶም ካሳዬ መዝገብ አስቀርበው ከኹለት ቀጠሮ በኋላ ፖሊስ መዝገቡን ወደ ፀረ ሽብር ዐዋጁ ቁጥር 652/2001 አንቀፅ 28 የቀየረበጽ ቀን ነበር፡፤ በዚህም መሰረት ፖሊስ የጠየቀውን ተጨማሪ 28 ቀናት የምርመራ ጊዜ ቀጠሮ ፈቅደው ‹‹እነ ዘላለም›› ሲሉ ጋዜጠኛ ተስፋዓለም ወልደየስ፣ጋዜጠኛ አስማማው ኃይለ ጊዮርጊስና የሕግ መምሕርና የዞን ዘጠኝ ጦማሪ ዘለዓለም ክብረት የሚቀርቡበትን መዝገብ ተጣሩ፡፡
ነገር ግን ፖሊስ ቀርቦ እስረኞቹ በመንገድ ላይ ስለኾኑ ፍርድ ቤቱ እስከዛው ሌላ መዝገብ እየተመለከተ እንዲቆይ ጠየቁ፡፡ ዳኛው ሌሎች መዝገቦችን እየገለጡ ማየት ጀመሩ፡፡ ሦስተኛውን መዝገብ አነሱና ተጣሩ፡፡ የቀረበ እስረኛ የለም በድጋሚ ተጣሩ፡፡
ፖሊስ ብድግ አለ፤‹‹የተከበረው ፍርድ ቤት እኛ ምርመራችንን ጨርሰናል መዝገቡን ለዐቃቤ ሕግ አስተላልፈናል ስለዚህ ይኽኛው መዝገብ ይዘጋልን›› በማለት አመለከተ፡፡
ዳኛው ‹‹ተጠርጣሪው የታለ?›› ሲሉ ጠየቁ፡፡ ‹‹ማዕከላዊ ነው፤እስር ቤት ነው›› ሲል መለሰ -ፖሊስ፡፡
ዳኛው ተቆጡ፤‹‹እሱን እስር ቤት አስቀምጣችሁ ነው እዚህ መጥታችሁ መዝገቡን የምታዘጉት? እስከዛው የሚታሰረው በማን ትእዛዝ ነው?እስከዛሬ እንደዚህ ነው የምታደርጉት?›› ሲሉ ጠየቁ፡፡
ፖሊሱ ለመከራከር ሞከረ፤‹‹እኛ ምርመራ ስለጨረስን ለዐቃቤ ሕግ ሰጥተናል እንግዲህ መዝገቡ ላይ የሚወስነው ዐቃቤ ሕግ ነው›› አለ ቆፍጠን ብሎ፡፡
ይህን ጊዜ ዳኛው ጠረጴዛውን በእጃቸው አጩኸው መቱት፡፡ ‹‹እናንተ ምርመራችሁን ጨረሳችሁና መዝገቡን ዘጋችሁ መቼ ነው ፍርድ ቤት የምታቀርቡት?በማን ትዕዛዝ ነው አስራችሁ የምታቆዩት?የእርሱስ መብት አይከበርም?እስር ቤት እንደፈለጋችሁ ሰው አስራችሁ ታስቀምጣላችሁ?መዝገቡን ዘግተናል ስትሉ እስረኛውን እዚህ አቅርባችሁ የሚለው ነገር መሰማት የለበትም?መብቱ አይከበርም?እስከዛው የት ነው ታስሮ የሚቆየው? መቼስ ነው ፍርድ ቤት የሚቀርበው?ዋስትና የመጠየቅ መብቱስ›› ከከፍተኛ ብስጭት ጋራ ፖሊሱን አጣደፉት፡፡
በወቅቱም፤‹‹እኚህ ዳኛ ምን አለበት ‘በእነ አጥናፉ መዝገብ’ እንዲህ ቆራጥ በኾኑ?›› ስል መመኘቴም አልቀረም፡፡ እንዲያውም፤‹‹ምናልባት ‘በእነ አጥናፉ መዝገብ’ ሕጉ ሲጣስ እያዩ በሞያቸው ምንም ማድረግ አለመቻላቸው አንገብግቧቸው በዚህኛው እልሃቸውን እየተወጡ ይኾናል›› ስል ከወዳጆቼ ጋራ ተወያይቼበት ነበር፡፡ በመጨረሻም እያጉረመረሙ ‹‹እንደዚህ ማድረግ አትችሉም፡፡ እስረኛም መብት አለው እናንተ እንደፈለጋችሁ እስረኛ ማቆየት አትችሉም ሰኞ ይዛችሁ ቅረቡ›› በማለት ትዕዛዝ ሰጡ፡፡

ሐምሌ አምስት
በፌደራል የመጀመሪያ ደረጃ ፍርድ ቤት አንደኛ ወንጀል ችሎት ነው፡፡ መዝገቡም ለቅዳሜ ሐምሌ 5 ቀን 2006 ዓ.ም የተቀጠረው ጋዜጠኛ ተስፋዓለም ወልደየስ፣ ዜጠኛ አስማማው ኃይለ ጊዮርጊስና፣የሕግ መምሕርና የዞን ዘጠኝ ጦማሪ ዘለዓለም ክብረት፣ጋዜጠኛ ኤዶም ካሳዬና የዞን ጦማሪዎቹ ናትናኤል ፈለቀና አጥናፉ ብርሃነ በአጠቃላይ የስድስቱ ተጠርጣሪዎች ኹለት መዝገብ፡፡
እስረኞቹ ወትሮ ይቀርቡበት ከነበረው ሰዓት በእጅጉ ረፍዷል፡፡ ቆይታው ግራ ያጋባቸው ጠበቃው አቶ አመኃ መኮንን ኹኔታውን ለማጣራት ወደ ችሎት ገቡና ጠየቁ፡፡
‹‹ውይ አለቀኮ›› የሚል ምላሽ ተሰጣቸው፡፡ ግራ ተጋቡ እዛው ቁጭ ብለው እንዴት ያልቃል፡፡ በዛ ላይ ፖሊስ ተጠርጣሪዎቹን ደብቆ ወደ ችሎት የሚያስገባበት የተወሳሰበ ሕንጻ የለው ያለችው አንዲት አሮጌ የጓሮ በር ቤት በኩል ገብተው፡፡ ምላሹን ማመን የከበዳቸው አቶ አመሐ ‹‹እዚህ ውጪ ቁጭ ብለን እየጠበቅን እንዴት ነው አለቀ የሚባለው?›› ሲሉ ጠየቁ፡፡ ‹‹ስንጠራችኹ፣ስንጠራችኹ አልሰማችሁም››የሚል ምላሽ ተሰጣቸው፡፡ ችሎቱና ግቢው አፍና አፍንጫ በኾነበት አሮጌው ፍርድ ቤት ግቢ ውስጥ ያኹሉ ሰው ቆሞ ሲጠሩ ሊሰሙ አለመቻላቸው አልዋጥ ስላላቸው፤‹‹ግቢ ውስጥ ከሦስት መቶ ሰው በላይ ተቀምጦ የእነርሱን ጉዳይ እየጠበቀ፤ጠበቃቸው እዚህ እያለ እንዴት አልሰማችኹም ይባላል?›› ብለው ቢጠይቁም ‹‹ጠበቃ አያስፈልጋቸውም ነበር›› የሚል ምላሽ ተሰጣቸው፤‹‹ተጠርጣሪዎቹስ መች ቀረቡ?›› ብለው ሲጠይቁም ‹‹እነርሱ አያስፈልጉም ነበር፤ፖሊስ ይህን መዝገብ ዘግቼ ጉዳዩን ለዐቃቤ ሕግ አስተላልፌያለኹ አለ በዛ መሰረት መዝገቡ ተዘጋ›› የሚል ምላሽ ተሰጣቸው፡፡

ሁለቱ ችሎቶች
ሁለቱ ዳኞች ግንቦት ዘጠኝም ሐምሌ አምስት የተሰየሙት በአንድ ችሎት ነው፡፡የተቀመጡበት ወንበርም አንድ ዓይነት ነው፡፡ የቀረበው ማመልከቻ ሐሳብም አንድ ዓይነት ነው‹‹ምርመራችንን ጨርሰናል ለዐቃቤ ሕግ አስተላልፈናል›› የሚል፡፡ውሳኔው ግን ሁለት ነው ያኛው ዳኛ ‹‹እስረኛን በጓሮ በር መቀባበል ወንጀል ነው›› ሲሉ ይኽኛው ዳኛ ደግሞ ሳያንገራግሩ ጥያቄውን ተቀብለዋል፡፡ የውሳኔው ውስጠ ወይራም፤‹‹ግዴለም እንዳሻችሁ ተቀባበሏቸው በፈለጋችሁት ቀንም ፍርድ ቤት አቅርቧቸው እስከዛው እንደፈለጋችሁ አድርጓቸው፡፡ ብትፈልጉ ቃሊቲ፣ብትፈልጉ ቂሊንጦ የፈለጋችሁበት አድርሷቸው ቤተሰቦቻቸውም ፈልገው ያገኟቸዋል፡፡›› ማለት ነው፡፡
ምን ዋጋ አለው እንደዛኛው ዳኛ ‹‹እናንተ ምርመራችሁን ጨረሳችሁና መዝገቡን ዘጋችሁ መቼ ነው ፍርድ ቤት የሚቀርቡት?እስከዛው በማን ትእዛዝ ነው ታስረው የሚቆዩት?የእነርሱስ መብት አይከበርም?በቃ እስር ቤት እንደፈለጋችሁ ነው አስራችሁ የምታስቀምጧቸው?መዝገቡን ዘግተናል ስትሉ እስረኞቹን አቅርባችሁ ጠበቃቸው ቀርቦ የሚያመለክቱት ነገር ካለ መሰማት አልነበረበትም?የዋስትና ጥያቄያቸው መሰማት አልነበረበትም?ከዚህ በኋላስ የሚታሰሩ ከኾነ እንኳን የት ነው ታስረው የሚቆዩት?ፍርድ ቤቱ ማወቅ የለበትም?›› በማለት የሚጠይቅ ሞጋች ዳኛ አልተገኘም፡፡ ለነገሩ ያኛው ዳኛም ይኸኛውን መዝገብ አጎንብሰው አልፈው በነጠላው መዝገብ ላይ ነበር ቀና ብለው የተቆጡት፡፡ የፍትሕ ሥርዐቱ እንደተዘባረቀ የሚቀጥለው እስከመቼ ይኾን?

ወራቱ ረመዷን ነው! ፍቷቸው!

ወራቱ ረመዷን ነው፡፡ በዚህ ወር ሰላም፣ ማርታ፣ ይቅርታ እና ምሕረት ነው የሚለመነው፡፡ አዲስ ሰው ለመሆን ነው ጥረት የምናደርገው፡፡ ባለፉት ሶስት ዓመታት ባሳለፍኳቸው ረመዳኖች የሚሰሩት ነገሮች ግን ከዚህ ቅዱስ ወር የምናገኘውን በረከትና ጸጋ በአግባቡ እንዳንቋደስ እና ቀልባችንን ሙሉ በሙሉ ወደ ፈጣሪያችን እንዳንመልስ ጋሬጣ እየሆኑብን ተቸግረናል፡፡

ወራቱ ረመዳን ነው፡፡ ትናንት ሰዎች ታስረዋል፡፡ ማን እንደታሰረም ስለሚታወቅ መግለጹ አስፈላጊ አይደለም፡፡ ነገር ግን በየጊዜው ሰዎችን ማሰር የምንመኛት ኢትዮጵያ እንድትመጣ ለማድረግ አንዳች ጠቀሜታ የለውም፡፡ ገዥው ፓርቲ የሚያልመውን የኢትዮጵያ ራዕይን በ2020 ለማሳካትም ሆነ ሌሎች በተለየ መንገድ የሚመኟትን ለሁላችንም የምትሆነውን ኢትዮጵያን ለመፍጠር ምንም አይፈይድም፡፡ በሰከነ መንፈሰ መደማመጥና ችግሮችን በውይይት ለመፍታት መጣር ነው ለሁሉም የሚበጀው፡፡

ወራቱ ረመዷን ነው፡፡ ይህ የተቀደሰ ወር ሸይጣን የሚታሰርበት እንጂ የሰው ልጅ ወደ ወህኒ የሚወረወርበት ወር አይደለም፡፡ ስለዚህ ትናንት የታሰረውን አብረሃ ደስታን ጨምሮ አላግባብ የታሰሩት ኢትዮጵያዊያን በሙሉ በአስቸኳይ ይፈቱ ዘንድ በሀያሉ ፈጣሪያችን ስም እንጠይቃችኋለን፡፡ ሌላም እስር በዚህ ወር እንዳይደገም ይደረግልን!!

ወራቱ ረመዷን ነው፡፡ ይህንን የእስር እርምጃ ተከትሎ በኢንተርኔት የሚካሄዱት አንዳንድ ልብ የሚነኩ ስድቦች እንዲቆሙም እንጠይቃለን፡፡ በተለይ የዘረኝነት ስድቦች እጅግ አሳፋሪና ደረጃችንን ዝቅ የሚያደርጉ ናቸው፡፡ ስለዚህ ሌላ ሌላውን መጻፍ እንጂ ስድቦቹን ማቆም ይገባል፡፡ “እምቢ!” ቢባል እንኳ እኛ ፈልገን ባላገኘነውና ከፈጣሪ በተሰጠን ዘር፣ ጎሳና ብሄረሰብ መሰዳደቡ ይቁምልን (በተለይ አንዳንዶች በተከበረው የትግራይ ህዝብ ላይ የሚያካሄዱት አስጸያፊ ስድብ በአስቸኳይ መገታት አለበት)፡፡

ወራቱ ረመዳን ነው! በአማን ጀምረነዋል፡፡ በአማን እንጨርሰው ዘንድ ነገሮች በጥንቃቄ ይያዙልን፡፡ አላህ ለሁላችንም ልቦና ይስጠን፡፡ አሚን!!

ወራቱ ረመዷን ነው!!

መንግስታዊ ሽብርተኝነትን የሚሸከም ትከሻ አይኖረንም!!!” ሰማያዊ ፓርቲ

የህወሓት/ኢህአዲግ አገዛዝ በኢትዮጵያ ስልጣን ላይ ከወጣበት ጊዜ ጀምሮ ዜጎችን በማፈንና በማሰቃየት ብሎም በመግደል የአፈና አገዛዙን ለረጅም ጊዜ ሲያራምድ መቆየቱ ዓለም የሚያውቀው ሀቅ ነው፡፡ በተለይም ባለፉት 10 ዓመታት የህዝብን ሰላማዊ እንቅስቃሴ ለማፈን እስራትና ግድያውን ህጋዊ ለማስመሰል የተለያዩ አፋኝ አዋጆችን አውጥቷል፡፡ እነዚህን አዋጆችንም ተገን አድርጎ በሰላማዊ መንገድ የሚታገሉ የፖለቲካ ፓርቲ መሪዎችንና አባለትን፣ ጋዜጠኞችንና ጦማርያንን፣ እንዲሁም የእምነት ተቋማት መሪዎችን እና በአገዛዙ ላይ ጥያቄ የሚያነሱ ዜጎችን ማሰሩን፣ ማሰቃየቱንና ግድያውን ተያይዞታል፡፡ በህገ መንግስቱ የተካተቱ የሰብዓዊ መብቶችንና ዓለም አቀፍ ስምምነቶችን በሙሉ የሚጥሰውና የአምባገነንነት ስልጣኑን ለማራዘም ሲል ያፀደቀው የፀረ-ሽብር አዋጅ ከፀደቀበት እለት አንስቶ ኢህአዴግ ለስልጣኔ ያሰጉኛል የሚላቸውን ፍፁም ሰላማዊ ታጋዮችንና ህገ መንግስታዊ መብታቸውን ተጠቅመው በድፍረት የፃፉ ጋዜጠኞችን ብሎም የእምነት ነፃነታችን ይከበር ብለው የጠየቁ የሀይማኖት መሪዎችን በጠራራ ፀሃይ ያለምንም ወንጀል በዚሁ ህገ ወጥ አዋጅ ‹‹የፀረ ሽብር ግብረ ሀይል›› በሚባል ማንነቱ በማይታወቅ የጨለማ ቡድን ወደ እስር ቤት እያጋዘ ይገኛል፡፡

ይህን የሚያጋልጡ ሚዲያዎችንም ለማፈን እስር ቤቶችን ጨምሮ በሚሊዮኖች የሚቆጠር ዶላር እያፈሰሰ የአየር ሞገድ ያውካል፤ በዚህ ሳያበቃ በሀገር ውስጥ በሰላማዊ መንገድ ተቃውሟቸውን የሚያሰሙ ፖለቲከኞችን ለማሸማቀቅ እንደ ኢሳት ያሉ ሚዲያዎችን የአሸባሪ ልሳን ብሎ በመፈረጅ ሚዲያውን የሚጠቀሙትን ደግሞ ከአሸባሪዎች ጋር ንክኪ እንዳላቸው አድርጎ መወንጀሉን ቀጥሎበታል፡፡ እንደሰማያዊ እምነት ማንም አካል መልእክት የሚያስተላለፍበትን የሚዲያ ተቋም ሊመርጥለት እንደማይችል መንግስት እንዲገነዘበው ከዚህ በፊት በግልፅ ያሳወቀ ሲሆን አሁንም ፓርቲው በዚሁ የፀና አቋሙ እንደሚቀጥል በድጋሚ ይገልፃል፡፡

ባጠቃለይ የዚህን ገዢ አካል የእውር ድንብር ሀገር የማስተዳደር ጉዞ ለመታገል በርካቶች በሰላማዊ መንገድ እየተንቀሳቀሱ ቢሆንም በህወሓት/ኢህአዲግ ግፍና መከራ ተገፍተው ስርዓቱን በሃይል እናስወግዳለን ብለው ሀገር ጥለው የተሰደዱ ዜጎችም እንዳሉ ይታወቃል፡፡ የህወሓት/ኢህአዲግ ማናለብኝነትና የስልጣን ጥመኝነትም በግለሰቦች ላይ ከሚያስከትለው ማህበራዊ ቀውስ በላይ በሀገሪቱ ኢኮኖሚያዊና ፖለቲካዊ ጉዳዮች ላይ ከፍተኛ አለመረጋጋትን አስከትሏል፡፡ በአሁኑ ሰዓትም ይህ ገዢ ፓርቲ የፈጠረው ስርዓት የሀገሪቷን ሰላማዊ የፖለቲካ ምህዳር በማጥበብ ሀገራችንን ወደ አልተፈለገ አለመረጋጋትና ቀውስ እየመራት ይገኛል፡፡ፓርቲያችንም እነዚህን ከላይ የተጠቀሱትና ሌሎችም በቅርቡ እየተፈፀሙ የሚገኙ ህገ ወጥ ድርጊቶች ስላሳሰበው ይህን መግለጫ ለማውጣት ተገዷል:-

1. ሰኔ 16 2006 ዓ.ም የየመን መንግስት የዓለም አቀፍ ስምምነቶችንና ድንጋጌዎችን በመጣስና በሰው ሀገር የውስጥ ጉዳይ በመግባት የአማፂ ቡድን ግንቦት ሰባት ዋና ፀሃፊ የሆኑትን አቶ አንዳርጋቸው ፅጌን መያዟ ይታወሳል፡፡ አቶ አንዳርጋቸው ፅጌ ህገ-ወጥ በሆነ መንገድ ለህወሓት/ ኢህአዴግ ተላልፈው መሰጠታቸውን ከ16 ቀናት በኋላ መታወቁና ይህንንም ሁለቱ ሀይሎች ማመናቸው ተሰምቷል፡፡ ነፃነት በሌለበት ሀገር ዜጎች ሰብዓዊ ክብራቸውን ለማስጠበቅ የሚያደርጉት ጥረት የሌሎች ሀገር መንግስታት የሚያደርጉትን ጣልቃ ገብነት በዓለም አቀፍ ስምምነቶችም ሆነ በተለይ በሁለቱ ሀገሮች ግንኙነት ላይ ከፍተኛ ጥላ የሚያጠላ መሆኑን ግንዛቤ አለመወሰዱ እጅግ የሚያሳዝን ድርጊት ነው፡፡ አቶ አንዳርጋቸው ፅጌ ከተያዙ በኋላ ላለፉት 16 ቀናት በምን አይነት ሁናቴ እንደቆዩ ህዝብና ቤተሰቦቻቸው እንዲያውቁት አለመደረጉ፤ ስለ አያያዛቸው ሁኔታም በማህበረሰቡና በፓርቲያችን ውስጥ ከፍተኛ ጥርጣሬ እንዲኖር አድርጓል፡፡ሰማያዊ ፓርቲ የአቶ አንዳርጋቸው ፅጌ ሰብዓዊ አያያዝ እያሳሰበው ህወሓት መራሹ የኢህአዴግ አገዛዝ አያያዛቸውን ግልፅ እንዲያደርግ ሰብዓዊ ክብራቸውም እንዲጠበቅ በጥብቅ ያሳስባል፡፡

2. በዚሁ ሳምንት ገዢው ፓርቲ ሐምሌ 1 ቀን 2006 ዓ.ም ፍፁም ሰላማዊ በሆነ መንገድ የአምባገነኑን መንግስት ህወሓት/ኢህአዲግን ሲታገሉ የነበሩ ፖለቲከኞችን በስመ አሸባሪ ከያሉበት እየለቀመ ህገ-ወጥ እስራት መፈፀሙ ይታወቃል፡፡ ህወሓት/ኢህአዲግ ይህ ግብታዊ ተግባሩ ምንም እንኳን አዲስ ባይሆንም በአሁኑ ወቅት ለውጥን ለማምጣት በቆራጥነት እየታገሉ ያሉ ሰላማዊ ታጋዮችን ማሰሩ በሀገር ውስጥ በህጋዊ መንገድ እየተንቀሳቀሱ የሚገኙ ፓርቲዎችን ከአማፂ ቡድኖች ጋር ግንኙነት ያላቸው በማስመሰል ሰላማዊ ትግሉን ለማዳከምና መጪውን 2007 ዓ/ም ምርጫ ያለ ተቀናቃኝ ለማለፍ የሚደረግ ህገ ወጥ እንቅስቃሴ መሆኑን ተገንዝበናል፡፡ የፓርቲያችን ብ/ም/ቤት ምክትል ሰብሳቢ የሆነው አቶ የሺዋስ አሰፋ በሰላማዊ ትግሉ በቁርጠኝነት እየተሳተፈ ባለበት ሁኔታ ለእስር መዳረጉ፤ የአንድነት ፓርቲ ህዝብ ግንኙነት ኃላፊ አቶ ሀብታሙ አያሌው፤ የአንድነት ፓርቲ የድርጅት ጉዳይ ምክትል ሀላፊ አቶ ዳንኤል ሺበሺ እና በሰሜኑ የሀገራችን ክፍል ከፍተኛ የህዝብ ንቅናቄን በመፍጠር ላይ ያለው የአረና /ትግራይ/ ፓርቲ አመራር አባል የሆኑትን አቶ አብረሃ ደስታ ለእስር መዳረጋቸው ህወኃት/ኢህአዴግ የመጨረሻው መጨረሻ ምዕራፍ ላይ መድረሱን ያረጋግጣል፡፡ በመሆኑም አገዛዙ እያካሄደ ያለውን መንግስታዊ ሽብር አቁሞ ለሀገርም ሆነ ለራሱ የሚበጀውን መንገድ እንዲከተል እያሳሰብን የታሰሩት የፓርቲ ከፍተኛ አመራሮች በአስቸኳይ እንዲፈቱ እንጠይቃለን፡፡

በመጨረሻም ፓርቲያችንን መንግስት እያደረገ ያለው ሽብርን የመንዛትና ህግን የመጣስ ተግባሩ መቼም ቢሆን ከሰላማዊ ትግሉ እንደማያቆመውና ሰላማዊ ትግሉን አጠናክሮ እንደሚቀጥል በአፅንኦት እየገለፀ እነዚህንና ከላይ የተጠቀሱትን የገዢውን ፓርቲ መርህ አልባነት፣ ህገ-ወጥነት እና የለየለት አምባገነንነትን አሁን ካለው ነባራዊ እውነታ ጋር አጣምሮ የትግል ስልቱን ደረጃ ከፍ ወዳለ ምዕራፍ ማሸጋገር እንዳለበት አምኗል፡፡ በመሆኑም ከዚህ በኋላ ለምናደርጋቸው ሀገር አቀፍ ንቅናቄዎች መላው የሀገሪቱ ህብረተሰብ በንቃት ተዘጋጅቶ እንዲጠብቅ ጥሪውን እያስተላለፈ ለዚህም ቁርጠኛ አመራር ለመስጠት ዝግጁነቱን ለመግለፅ ይወዳል፡፡በዚህ አምባገነንነትን ለመታገል በሚደረገው ንቅናቄም በሀገር ውስጥ የሚገኙ ህጋዊና ሰላማዊ ፓርቲዎች፤አለም አቀፍ ተቋማት፤የሰብአዊ መብት ተሟጋቾች፤ሲቪክ ማህበራት፤መላው ኢትዮጵያውያንና ትውልደ ኢትዮጵያውያን ከሰላማዊ ትግሉ ጎን በጋራ እንድንቆም እንጠይቃለን፡፡

ታዋቂዎቹ ፖለቲከኞች በማእከላዊ እስር ቤት መታሰራቸው ታወቀ

በፌደራል ፖሊሶች እየተደበደበ ወደ አልታወቀ ስፍራ ተወስዶ የነበረው ታዋቂው ፖለቲከኛና ጸሃፊ አብርሃ ደስታ ማእከላዊ እስር ቤት መታሰሩ ታውቋል። የአብረሃ መኖረያ ቤት በፖሊሶች እንደተፈተሸም ለማወቅ ተችሎአል።

የአንድነት ፓርቲ የህዝብ ግንኙነት ሃላፊ ወጣት ሃብታሙ አያሌው፣ የፓርቲው ምክትል የድርጅት ጉዳይ ሃላፊ ዳንኤል ሽበሺ እንዲሁም የሰማያዊ ፓርቲ ምክር ቤት ምክትል ሰብሳቢ አቶ የሽዋስ አሰፋ ዛሬ ፍርድ ቤት እንደሚቀርቡ ሲገለጽ፣ ዜናውን እስካቀረብንበት ጊዜ ስለተከፈተባቸው ክስ ለማወቅ የተደረገው ጥረት አልተሳካም።

በኢትዮጵያ ሃሳባቸውን በነጻነት በመግለጻቸው እንዲሁም የተቃውሞ የፖለቲካ ድርጅቶችን በመቀላቀላቸው የሚታሰሩ ኢትዮጵያውያን ቁጥር ከመቼም ጊዜ በላይ ጨምሯል።